Ерөнхийлөгч асан Ц.Элбэгдорж маргааш буюу 3-ны өдөр Токио-Улаанбаатарын тусгай үүргийн нислэгээр эх орондоо ирэх болсон байна. МИАТ компанийн тусгай үүргийн онгоц өнөөдөр орой 19.00 цагт Наритад бууж, маргааш өдөр 13.05 цагт Улаанбаатарт буухаар нислэгийн цагаа мэдээлжээ. Уг онгоцоор Ерөнхийлөгч асан эх орондоо ирнэ гэдгээ өөрийн твиттер хуудсаар жиргэсэн байна.

Мөн ирэх 2021 оны Ерөнхийлөгчийн сонгуульд Х.Баттулгатай өрсөлдөхөөр шийдсэнээ ч мөн зарласан байна. Тэр энэ тухай,

“Нутгийн зүг хөлгийн жолоо залахад бэлэн боллоо. УБ-аас Токиод МИАТ-ийн онгоц буух сайхан мэдээ сонслоо. Эх нутагтаа очих сургаар над руу ирэх дайралт ширүүсэж байна. Ийм юм надад улам эрч хүч нэмж, намайг хурцалдаг юм. Цаг болж. Би доорх маягаар хариу барихаар шийдлээ. Болгооно уу" гээд,

"Намайг очих мэдээг албаны шугамаар түрүүлж авсан нэгэн их цочин сандарчээ.

Ирүүлэхгүй араас нь гүтгээд сууж байх төлөвлөгөө нь нурж. "Чамайг тэнд хорино" гэж хүртэл бичүүлж сэвж, айлгаж дарамтлах гэж үзжээ. Ингэвэл ирэхээ больчих байх гэж тооцсон бололтой. Би үүнийг хараад юу бодсоноо шууд хэлчихье.

Хэрэв Халтмаагийн Баттулга Ерөнхийлөгчийн дараагийн сонгуульд дахин нэр дэвшвэл би түүнийг сөрж өрсөлдөх болно гэдгээ үүгээр зарлаж байна. Учир нь Х.Баттулга Монголын ард түмний язгуур эрх ашиг, эрх чөлөө, хууль ёсонд хамгийн хор уршиг бүхий албан тушаалтан юм. Түүний харь барьцаанаас Монгол төрийг аврах, чөлөөлөх нь Монголоо гэсэн хүн бүрийн нэн тэргүүний зорилт. Намайг Баттулга махны машинаараа хэчнээн далайлгаж, дарамтлах, яллах гэж оролдлоо ч Монгол Улсын хууль, эрх ашгийг зөрчсөн үйлдэл надаас нэг ширхэг ч олж чадахгүй. Надад тийм зүйл байхгүй. Төрийнхөө хуулийг хүндэтгэж, хар цагаанаа шударгаар ялгуулах нь миний хувьд нэр төр, бахархал байх болно.

Эх орон, Эрх чөлөө хоёроо бүтэн байгаа цагт, сонгууль талцал руу эргэж буцахгүй гэж би өөртөө хатуу шийдсэн байсан юм. Гэхдээ хоргоож боргоогоод хандсан зүгт алхуулахгүй бол тулгарах ямар ч бэрхшээл сорилтоос надад хойш суух шалтгаан байхгүй.

Монголын ард түмний язгуур эрх ашиг, ардчилсан эрх чөлөөт сонголтын хувь заяа, ард иргэдийн маань эрх эрх чөлөөт байдал миний эрхэм дээд дуудлага, зорилт байсаар байх болно" хэмээн жиргэсэн байна. 

2017 оны Ерөнхийлөгчийн сонгуулиас хойш “түнжин хагарсан” хоёр эрхэм, сайнаар яривал найз нөхөд, саараар бол галын шугамын хоёр талд гарсан улс төрийн ширүүн өрсөлдөгчид ийнхүү нэг нь нөгөөгөө “дуэльд” дуудлаа. Хэн нь ялагч, ялагдагч болохыг цаг хугацаа харуулна.

Хэрвээ Ц.Элбэгдорж ялагч болж гэмээн өнгөрсөн найман жил Монголын төрийг тэргүүлэхдээ алдсан алдаагаа залруулах, Монгол Улсыг мөрөөдөж ярьдаг байсан ардчиллынхаа замд буцаан оруулах боломж гарч мэдэх л юм. Харин. Х.Баттулга ялж гэмээн Ц.Элбэгдоржийн дутуу барьсан хонгилыг гүйцээн засч, хонгилын түлхүүрийг дахиад зургаан жил барих болно.

Харин эдгээр эрхмүүд ирэх онд болох Ерөнхийлөгчийн сонгуульд өрсөлдөх эсэх нь хувь этгээдүүдээс гэхээс илүү АН-аас шалтгаална. АН ямар хоёр нэр дэвшигч гаргалтай биш. Х.Баттулгын хувьд Монгол Улсын Ерөнхийлөгчөөр сонгогдсоноосоо хойш намын АН-ын гишүүнээс түдгэлзээд байгаа. Гэхдээ АН түүнийг дахин нэг удаа нэр дэвшүүлэх эрх нь бий. Харин Ц.Элбэгдоржийн хувьд Ерөнхийлөгчийн албанаас буусан даруйдаа намын гишүүнчлэлээ сэргээсэн, жинхэнэ гишүүн. Тэр утгаараа дахиад нэг жил гаруйн хугацаанд улс төрийн намын үйл ажиллагаанд идэвхитэй оролцох боломж нь бий. Хэрхэхийг цаг хугацаа харуулах биз.