Нийслэлийн ИТХ-ын Тэргүүлэгчид өнөөдөр ээлжит хуралдаанаа хуралдав. Хуралдаанаар коронавирусийн халдвараас урьдчилан сэргийлэх ажлын хүрээнд нийслэл Улаанбаатар хотод эрсдлийн үнэлгээ хийхэд "өндөр эрсдэлтэй" гарчээ.
Мөн өвчлөл гарсан үед хэрхэн ажиллах төлөвлөгөөг нийслэлээс гарган ажиллаж байгааг танилцуулсан юм.
Энэ үеэр НИТХ-ын дарга Р.Дагва “Улаанбаатар хотын эрсдэлийн үнэлгээ өндөр гарсан учир иргэн бүр өндөр хариуцлагатай байх ёстой болж байна. Гараа тогтмол угааж, ариутгах, амны хаалт зүүх, олны хөлийн газраар зорчихгүй байх нь чухал. НИТХ өндөржүүлсэн бэлэн байдалд ажиллаж, холбогдох шийдвэр гаргахад бэлэн байна” гэв.
Түүнчлэн нийслэлийн 9 дүүргийн ИТХ-ын дарга нарт “Коронавирусийн халдвараас урьдчилан сэргийлэх ажилд бүхий л талаар дэмжлэг үзүүлэх, тухайн нутаг дэвсгэр дэх шашны байгууллагын үйл ажиллагаанд хяналт тавих”-ыг үүрэг болгов.
Онцгой нөхцөлийн дэглэмтэй холбогдуулан НИТХ-ын тэргүүлэгчид цахимаар хуралджээ.