Улс төрийн 11 нам, Төрийн бус 109 байгууллага, мэргэжлийн 26 холбоод, эрдэмтэд нам харгалзахгүй эвлэлдэн нэгдсэн гэх “Шинэ Эвсэл” мөрийн хөтөлбөрөө боловсруулан Үндэсний аудитын газарт хүргүүлсэн талаараа өнөөдөр мэдээлэл хийлээ.

ШИНЭН, БНН, Үнэн ба Зөв нам, МҮАН болон бусад дэмжигч намуудаас бүрдсэн “Шинэ Эвсэл”-ийн даргаар УИХ-ын гишүүн, ШИНЭН-ын дарга Ж.Батзанданг сонгосныг мөн мэдэгдлээ.

Эвслийн зүгээс Монгол Улсыг үсрэнгүй хөгжүүлэх “Шинэ эргэлтийн 21 бодлого" гэгчийг боловсруулан, олон нийт болон эрдэмтэн, судлаачид, эвсэлд нэгдсэн намуудын гишүүдээс санал авч мөрийн хөтөлбөрөө баталсан гэв.

МҮАН-ын дарга Б.Цогтгэрэл:

-“Өнөөдөр Монголын нийгэм ямар байгааг хүн бүр дороо бодож, нэг л бишээ хэмээн дүгнэж байгаа. Тэгвэл бид дараагийн 30 жил ямар байх вэ гэдгийг чухам өнөөдрөөс эхлэн Шинэ эвсэлтэйгээ хамтран тодорхойлох түүхэн цагийн өмнө ирээд байна. Өнгөрсөн 30 жилд МАН, АН хоёрын хооронд Монголын нийт хөрөнгө, хүн хүчийг хуваан тарамдууллаа. Энэ талцал монголчуудад, монгол гэр бүлд ашиггүй байсан.  Цаашид Монгол улсын 330 сум дотроо АН, МАН гэж талцдаг биш хөгжил дэвшлээрээ уралддаг, Монгол улс бүхэлдээ хөрш зэргэлдээ улс орнууд, бүс нутагтаа, дэлхийн улс орнуудтай өрсөлддөг байх ёстой. Үүний тулд хүчирхэг төр хэрэгтэй, хүчирхэг төрийн үндэс болсон хүчирхэг гэр бүл, хүчирхэг Монгол хүмүүс хэрэгтэй. 

Үнэн ба Зөв намын дарга А.Отгонбаатар:

-“Та нар нэгдээд хол явах уу гэж хүмүүс асуугаад байгаа. Би тэдэнд “Биднийг нэгдээд хол явах уу гэж битгий асуу. АН, МАН-аар удирдуулсан 30 жилдээ Монголын ард түмэн хол явсан уу гэж өөрсдөөсөө асуу” гэж хэлж байгаа. 30 жил хийгээгүй энэ хоёр намыг одоо хийнэ дээ гэж итгэдгээ больё. Өнгөрсөн 30 жилийг МАН, АН бичсэн байж болно оо. Ирж байгаа шинэ цагийг "Шинэ Эвсэл" бичнэ гэдэгт би итгэж байгаа. Авилгачдаа ордонд залчихсан, ард түмэн нь гадагшаа дүрвэсэн эх орон байдаггүй юм аа. Өнөөдөр харийн оронд ажиллаж байгаа мянга мянган хүнийг эх орондоо ирж сайхан ажиллах, эх орондоо амьдарч байгаа хүний авсан цалин нь амьдралд нь хүрдэг чинээлэг амьдралын төлөө бид алхана. Хөдөлмөрлөсөн хүнд боломж олгодог, хөлсөө урсагасан хүн сайхан амьдрах нийгмийн төлөө бид явна гэж зорьж байгаа.

Эвслийн мөрийн хөтөлбөрт,

• -Шүүх засаглал, хуулийн байгууллагууд дахь завхрал, авлига, шударга бус байдлын суурь нөхцөлүүдийг устгах зорилгоор хуулиудын давхардал, зөрчил, хийдлийг арилгах,
• -Үндсэн хуулийн өөрчлөлтийг үргэлжлүүлж, улс төрийн намуудын хатуу гишүүнчлэлийг байхгүй болгож, намчирхал, талцлыг таслан зогсоо,
• -Хариуцлага, сахилга батыг тогтооход онцгойлон анхаарч, авилга, албан тушаалын гэмт хэргийг хөөн хэлэлцэх хугацаагүй болгох, 
• -Банк, санхүүгийн салбар дахь монополь тогтолцоог задлан, ард иргэдээ санхүү, зээлийн хүүгийн мөлжлөгөөс чөлөөлж, улмаар өнгөрсөн 30 жилийн турш хуримтлуулсан 30 тэрбум ам.долларын өрийг 3 сая иргэнээр бус 30 гэр бүл, тэдний хамаарал бүхий этгээдүүдээр төлүүлэх “Өргүй Монгол” хөтөлбөр хэрэгжүүлэх,
• -Стратегийн орд газруудыг иргэддээ өмчлүүлж, баялгийн хувьсгал хийх,
• -Экспортыг дэмжсэн “Хөгжлийн хүрд” хөтөлбөрийг хэрэгжүүлэн нэмүү өртөг шингэсэн үйлдвэрлэлийн салбарыг хөгжүүлэх, 200 мянган ажлын байрыг шинээр бий болгох зэрэг асуудлууд багтсан байна.