Монгол Улсын сайд, Ерөнхий сайд асан М.Энхсайхан “Үндэсний эрх ашгийн эсрэг хорлон сүйтгэхээр завдсан” хэргээр шүүхийн хаалга татаад байна. Түүнийг 2014-2016 онд Монгол Улсын сайдаар ажиллаж байхдаа Тавантолгой төслийн хөрөнгө оруулалтын гэрээг боловсруулсных нь төлөө АТГ-аас эрүүгийн гэмт хэрэгт сэжиглэн хоёр жил шалгасны эцэст “үндэсний эрх ашгийг хорлон сүйтгэхээр завдсан” хэмээн буруутгаж, яллах дүгнэлт үйлдэн шүүхэд шилжүүлээд байна.

М.Энхсайхан энэ тухай “Хөрөнгө оруулалтын гэрээг УИХ-аар хэлэлцээгүй, батлагдаагүй гэрээ учраас надад тохох хэрэг олдохгүй ийм зүйл ангиар яллаж байна. АТГ дээрээс даалгавартай ажиллаж байна. Хэрэгт хяналт тавьсан прокурор нь ядаж хуулиа мөрдөх болов уу гэж хүлээсэн ч тийм зүйл болсонгүй. АТГ, прокуророос шударга ёсны тухай хүлээгээд хэрэггүй юм байна. Шүүх яаж ажиллахыг мэдэхгүй байна. Гэхдээ би өөрийнхөө энэ кейсийг аль болох нийгэмд хэрэгтэй кейс болгохын төлөө ажиллана Энэ хэрэгтэй холбоотойгоор Монголын нийгэм өөрөө өөрийгөө таниад засамжлах аргаа олоод авбал болоо. Тэр л миний гүйцэтгэх үүрэг” хэмээн ярьсан байна.

Мөн тэрээр хэргийг нь шүүхээр хуваарилагдсан гурван шүүгчийн нэрийг цохож, “Энэ гурван шүүгчийн гарт миний хувь заяа байгаа” гэв. М.Энхсайханы хэргийг шүүхээр хуваарилагдсан С.Оюунчимэг, З.Болдбаатар, Д.Мөнх-Эрдэнэ нар нь 2017 оны наймдугаар сард Эрүүл мэндийн сайд асан Г.Шийлэгдамба нарын авилгын хэргийг шийдвэрлэж байжээ. Г.Шийлэгдамба нь бусдаас хандив нэрээр 500 сая төгрөг авч байгаад үйлдэл дээрээ баригдаж, Сүхбаатар дүүргийн Эрүүгийн хэргийн анхан шатны шүүхээс түүнд 5,1 жил, авилга өгсөн О.Даваасүрэнд 1,6 жилийн хорих ял оноосон байна.

М.Энхсайханы өөрийнх нь хэргийг шүүхээр хуваарилагдсан шүүгч нарын нэрийг ийнхүү хэвлэлээр зарласан нь санаандгүй зүйл биш. Харин “хонгилын” гэж нэрлээд байгаа нэг хүнээс хараат болсон тогтолцоогоо сөрж, хараат бусаар шийдвэрээ гаргаж чадах шүүгч Монголд үлдсэн үү, үгүй юу гэдэгт хариулт авахаар тавьж буй асуулт гэж болох юм.

Б.ЗАЯА