БНСУ-д зорчиж явсан МАН-ын нарийн бичгийн дарга Ц.Бат-Энх өчигдөр орой 18.30 цагт Токио-Улаанбаатарын сүүлийн нислэгээр Буянт-Ухаад буужээ. УОК-ийн шийдвэрээр Сөүл-Улаанбаатарын шууд нислэгийг цуцалсан тул МАН-ын нарийн бичгийн дарга Токиогоор дамжин эх орондоо ирсэн байна.

Хилийн мэргэжлийн хяналтынхан түүнд халдвар тархсан бүс нутгаар ирсэн учир түр хугацаагаар тусгаарлаж, шинжилгээ өгөх шаардлагатай гэдгийг тайлбарласан авч шаардлагыг эс зөвшөөрч эсэргүүцэл үзүүлсэн тул албадлага хэрэглэхэд хүрчээ. Ц.Бат-Энхийг албадан саатуулж, Жаргалантын аманд байрлах ОБЕГ-ын тусгаарлах байранд хүргэсэн тухай эх сурвалж мэдээлжээ.

Мөн түүнтэй хамт БНСУ-аас дамжин ирсэн 38 монгол иргэнийг ХӨСҮТ-д шилжүүлэн түр хугацаагаар тусгаарласан байна.

БНСУ-аас ОХУ-аар дамжин ирсэн иргэдийг тусгаарлалаа 

Мөн өдөр (2020.02.27) Сэлэнгэ аймгийн Онцгой комисс ОХУ-ын Улаан-Үүд хотооос 11 монгол иргэнээ эх оронд нь шилжүүлэн авчээ. Тэдгээр иргэд 2020.02.25-ны өдөр Инчеон-Иркутск чиглэлийн S7 6302 дугаарын нислэгээр БНСУ-аас ОХУ-д ирж, Улаан-Үүд хотод байрлажээ.

Сүхбаатар боомт дахь Хилийн мэргэжлийн хяналтын алба эдгээр 11 иргэдээс эрүүл мэндийн асуумж судалгаа авч, анхан шатны үзлэг хийж, шинэ коронавирусийн өвчлөл гарсан Сувон хотоос ирсэн гурван иргэнийг нарийвчилсан үзлэг шинжилгээнд хамруулахаар Сэлэнгэ аймгийн Нэгдсэн эмнэлэгт шилжүүлжээ. Бусад 8 иргэн, тээврийн жолооч, Зоонозын өвчин судлалын төвийн эмч, нийт 10 иргэнийг Алтанбулаг боомтын тусгаарлах бүсэд шилжүүлэн тусгаарлах арга хэмжээг авсан байна.