УИХ дахь МАН-ын бүлгийн дарга Д.Тогтохсүрэн нь 2020 оны нэг дүгээр сарын 17-18 нд шилжих шөнө буюу өнгөрсөн шөнө (орон нутгийн цагаар) Австрали улсын Сидней хотын казинод тоглож байгаа зургийг zarig.mn өнөөдөр нийтэлжээ. МАН-ын бүлгийн даргын казино тоглож буй бичлэгийг тэнд байсан монгол иргэдийн нэг нь хийсэн бололтой.
Ердөө хоёрхон сарын өмнө ЗГХЭГ-ын дарга Л.Оюун-Эрдэнэ мэдэгдэл хийж, "Төрд ажиллаж байгаа хэн боловч гадаадад казино тоглож болохгүй, хэрвээ тоглосон тохиолдолд ажлаас нь чөлөөлнө" гээд энэ тухай Засгийн газраас журам гаргаж хэрэгжүүлэхээр болсон билээ. Мөн төрийн албаны тухай хуульд өөрчлөлт оруулахаа мэдэгдсэн. Энэ шалтгаанаар оны өмнө хоёр ч хүн ажил, албан тушаалаасаа чөлөөлөгдсөний нэг нь ГЕГ-ын дэд дарга Е.Бат-Эрдэнэ, нөгөөх нь МИАТ ХК-ийн Сөүл дэх төлөөлөгчийн газрын ажилтан С.Баатарцогт.
Харин МАН-ын бүлгийн даргын хувьд Засгийн газрын баталсан журам үйлчлэхгүй байж болох ч УИХ-ын гишүүний хувьд ёс зүйн хариуцлага хүлээх ёстой гэж үзэх хүн олон байна. 
Сануулахад, МАН-ын бүлгийн дарга УИХ-ын дарга Г.Занданшатарын хамт Австралийн Холбооны Улсад болсон Ази, Номхон далайн орнуудын парламентын 28 дугаар чуулганд оролцоод өнөөдөр эх орондоо ирж байгаа юм. Айлчлалын бүрэлдэхүүнд УИХ-ын гишүүн Д.Лүнжээжанцан, Ж.Мөнхбат, АН-ын зөвлөлийн дарга Д.Эрдэнэбат нар мөн багтсан байна.
Сэтгэгдэл (3)