Чөлөөт бөхийн эрэгтэйчүүдийн “Алан 2019” олон улсын III тэмцээн энэ сарын 7-8-нд ОХУ-ын Владикавказ хотод болж шилдгүүдийг тодруулжээ.
Тэмцээнд 25 орны 235 тамирчин 10 жинд өрсөлдөж, Монголын зургаан тамирчин хүч үзсэнээс гавьяат тамирчин Эрдэнэбатын Бэхбаяр 57 кг-ын жинд мөнгөн медаль хүртжээ.
ДАШТ-ий хошой хүрэл медальт, “Жакарта-2018” Азийн наадам болон 2016 оны Азийн аварга, “Хангарьд” спорт клуб, “Алтай” констракшны тамирчин Э.Бэхбаяр Владикавказын дэвжээнд тэгшитгэлийн барилдаанд Дагестаны Р.Минтуллаевыг 2:2-оор, 1/8 шигшээд 2017 оны Азийн залуучуудын аварга Узбекстаны бөх Ж.Туробовыг 10:0-ээр, энэ жилийн ОХУ-ын аварга Р.Гамзатовыг 4:1-ээр ялсан байна.
Хагас шигшээд 2019 оны Европын залуучуудын АШТ-ий хүрэл медальт эзэн орны А.Сабановыг 2:1-ээр тус тус ялсан ч алтан медалийн төлөөх барилдаанд 2018 оны дэлхийн залуучуудын аварга Дагестаны Ахмед Идрисовт 2:5-аар ялагдаж мөнгөн медаль хүртжээ.
Владикавказын дэвжээнд олимп, дэлхийн 30-аад медальтан зодоглосон бөгөөд дэлхийн аварга ОХУ-ын Бекхан Гойгереев, Гүржийн Бека Ломтазе, олимпийн медальт Узбекистаны Ихтиор Наврузов, Магомед Ибрагимов, ДАШТ-ий медальт ОХУ-ын Алан Гогаев, Анзор Болтукаев, АНУ-ын Томас Гилман, Ник Гвяздовски, Казахстаны Нурислам Санаев, Словакын Борис Макоев, Узбекстаны Хасанбой Рахимов нар медальгүй хоцорсон нь энэ удаагийн тэмцээний чансааг харууллаа хэмээн спорт сонирхогчид дүгнэсэн байна.