Тайландын Бангкок хотноо арваннэгдүгээр сарын 22-28-ны хооронд Байт харваан Азийн аварга шалгаруулах тэмцээн болж байна. Тус тэмцээнээс олимпийн эрх олгодог билээ.

Тэгвэл дөнгөж сая эрэгтэйчүүдийн ганцаарчилсан төрөлд ОУХМ Баатархуягийн Отгонболд “Токио-2020” олимпийн наадамд оролцох эрхээ авлаа.

Тэрбээр урьдчилсан харваанд 649 оноогоор гуравдугаарт бичигдэж, эхний харваанд гоц мөргөсөн бөгөөд хасагдах харваанд Саудын Арабын харваач Абдалелах Биналиг 6:4-өөр ялсан. Харин 1/8-ийн харваанд Тайландын харваач Танапат Патайраттай 5:5 -аар тэнцэж, нэмэлт сумаар ялалт байгуулж, шөвгийн наймд шалгарсан юм.

Шөвгийн наймд манай харваач Вьетнамын Ду Ан Чутай цэц сорьж, мөн л 5:5-аар тэнцэж, нэмэлт сум харваж 5:6 оноогоор хожигдлоо.

Азийн аварга шалгаруулах тэмцээнээс гурван улс олимпын эрх авах боломжтой бөгөөд нэг улсад нэг эрх олгодог аж. 

Харин 1/4-ийн хагас шигшээд Ираны хоёр, Вьетнамын хоёр харваач шалгарсан тул нэг улсаас нэг тамирчинд эрх олгох журмын дагуу шөвгийн наймд шалгарсан харваачдаас манай тамирчин тавдугаар байрт орж, ийнхүү эрхээ авлаа.

Монголын байт харваачид “Мюнхен-1972” Олимпийн наадмаас эхлэн олимпод оролцсон бөгөөд 1976, 1980, 1988, 1992, 1996, 2012, 2016 оны олимпод цэц сорьж байсан. 2018 оны Азийн наадам, 2019 оны Дэлхийн АШТ гээд Олимпийн эрх олгосон тэмцээнээс манайхан эрхээ авч чадаагүй байсан ч ийнхүү эрхээ авч чадлаа.

Одоо манай шигшээ багийн тамирчдад ирэх оны гуравдугаар сард болох сүүлчийн эрх олгох "Берлины цом" тэмцээнээс эрэгтэй, эмэгтэй, холимог багийн төрлөөр эрх авах боломжтой юм. 

Ц.Туяа