БНХАУ-ын Юньнань мужид болж буй Олон улсын олон өдрийн дугуйн уралдааны 3 дахь гарааны дараах байдлаар, Монголын дугуйчин М.Баасанхүү нийлбэр дүнгээр тэргүүлж байна.
Энэ жил 6 дахь удаагаа зохион байгуулж буй Олон улсын дугуйн олон өдрийн уралдааны 3 дахь гараанд эрэгтэйчүүдийн ангилалд Э.Билгүүнжаргал түрүүлжээ. Эмэгтэйчүүдийн ангилалд Аннемейк Стегхуйс түрүүлсэн бөгөөд энэ тамирчин нийлбэр дүнгээр эмэгтэй дугуйчдаа тэргүүлж байгаа юм. Юньнань мужид болж буй дугуйн уралдааны гурав дахь өдөр Йенжиан дүүргийн уулын өгсүүр замд 118 км замд уралджээ. Э.Билгүүнжаргал 118 км замыг 3 цаг 7 секундэд туулсан бөгөөд М.Баасанхүү энэ гараанд 2 дугаар байрт орсон байна.
Энэ жилийн олон өдрийн уралдаан Мангши дүүргээс Лижиань хүртэл 650 км замд үргэлжлэх бөгөөд тус уралдаанд 36 улсын 1000 тамирчин оролцож байгаа аж.