Өнгөрсөн оны тавдугаар сард 37 настай ажилгүй Игорь Подпорин гэгч эр согтууруулах ундаа хэрэглэсэн үедээ төмөр хамгаалалтын шонгоор "Догшин Иван ба түүний хүү Иван" зургийг хэд хэдэн удаа цохин гэмтээсэн тухай бид таньд хүргэж байсан билээ. Бүдүүлэг этгээдийг баривчилсан боловч эмнэлэгийн зүгээс түүнийг хэрэг хариуцах чадвартай гэж үзэн шүүхэд шилжүүлсэн байдаг. 

Москва хотын Третьяковын галерей Илья Репиний "Догшин Иван ба түүний хүү Иван" нэртэй алдарт бүтээлийг гэмтээсэн Игорь Подпорин гэгчээс 20 сая рублийн (ойролцоогоор монгол мөнгөөр 800 сая төгрөг) нөхөн төлбөр нэхэмжлэхээр болжээ. Энэ мөнгө нь бүхэлдээ тус бүтээлийг нөхөн сэргээхэд зарцуулагдах аж. Третьяковын галерейн хуулийн зөвлөх Евгений Мельниковын хэлснээр уг бүтээл нь 1,04 тэрбум рублиэр үнэлэгддэг аж.

Зураач Репин энэхүү зургийг бүтээж байхдаа өөрөө цуст сэдвийнхээ дарамтад орсон гэдэг. “Заримдаа надад аймшгийн болоод би түүнийг нууж далдалдаг байлаа” гэж зураач дурсан ярьж байжээ.

Тийм сэтгэгдлийг ч зураачийн найз нар бас амсаж байжээ. Репин юу хийснээ дөнгөж ухаарсан хааны агшинг сонгон хүчтэй сэтгэл зүйн сөрөг эрчимтэй зургийг зуржээ. Зураг яваандаа зураачийн загвар болсон хүмүүсийн хувь тавилангийн талаар элдэв муу домог яриа үүссэн гэдэг. Гэхдээ одоог хүртэл зарим түүхчид Догшин Иван хүүгээ хөнөөгөөгүй хэмээн үздэг билээ.

Харин хэрэгтэн Репиний уран зургийг "түүхэн үнэнээс зөрсөн" гэх шалтгаанаар сүйтгэсэн хэмээн энэ үйлдлээ тайлбарлажээ.