/Reuters/ АНУ-ын Дээд шүүхээс тус улсын Теннесси муж улсад 200 жилийн дараа анх удаа эмэгтэй хүнийг цаазлах ажиллагааг явуулахыг зөвшөөрсөн шийдвэрийг лхагва гарагт гаргажээ. Ингэснээр 30 жилийн өмнө 18 настай байхдаа ангийнхаа охиныг хөнөөсөн Криста Пайкийн цаазын ялыг үхлийн тариа хийн нь гүйцэтгэх боломжтой болж байна.

Одоо 50 настай Пайк бага насандаа авсан сэтгэл зүйн гэмтэл, бэлгийн хүчирхийлэлд өртөж байсандаа үндэслэн өршөөл үзүүлэх хүсэлт гаргасан боловч Теннесси муж улсын захирагч Билл Ли даваа гарагт уг хүсэлтийг нь хүлээн аваагүй байна. Хэрэв түүнийг цаазалбал АНУ-д цаазаар авах ялыг сэргээснээс хойших орчин үеийн түүхэнд Теннесси муж улсад өсвөр насандаа үйлдсэн гэмт хэргийнхээ төлөө цаазлуулсан цорын ганц хүн болох юм.

Дээд шүүхийн консерватив үзэлтэй зургаан шүүгчийн олонхын саналаар гаргасан тогтоолын дагуу Пайкийг цаазлах ёстой байсан хугацаанаас нэг цагийн өмнө АНУ-ын Давж заалдах шатны 6 дугаар тойргийн шүүхийн гурван шүүгчээс бүрдсэн бүрэлдэхүүнээс гаргасан цаазын ялыг түр түдгэлзүүлэх шийдвэрийг хүчингүй болгожээ.

Давж заалдах шатны бүрэлдэхүүн Пайкийн хүүхэд байхдаа бэлгийн хүчирхийлэлд өртөж байсан нотлох баримтыг ял оноох үед нь хангалттай авч үзээгүй гэсэн гомдлыг нь хэлэлцэх хугацаа олгох үүднээс "ялыг гүйцэтгэх хугацааг түр хойшлуулах" шийдвэр гаргажээ.

Гэвч Теннесси муж улсын Ерөнхий прокурорын газар нэн даруй АНУ-ын Дээд шүүхэд хандаж, уг шийвэрийг хүчингүй болгохыг хүссэн байна. Улмаар Дээд шүүх Теннесси муж улсын талд шийдвэр гаргажээ.

Муж улсын эрх баригчид цаазлах ажиллагааг яг хэдэн цагт явуулах талаар тодорхой мэдээлээгүй байна. Пайкийг тус муж улсын  нийслэл Нэшвилл хот дахь Ривербендийн чанга дэглэмтэй хорих ангид цаазлахаар төлөвлөжээ. Хэрэв муж улсын эрх баригчид тогтоосон хугацаанд цаазлах ажиллагааг явуулж амжихгүй бол Дээд шүүхээс дахин зөвшөөрөл авах шаардлагатай болно гэж Цаазаар авах ялын мэдээллийн төвийн гүйцэтгэх захирал Робин Махер хэлсэн байна.

Пайк 1995 оны нэгдүгээр сард 18 настай байхдаа 17 настай найз залуу болон өөр нэг хамтрагчийн хамт тухайн үед 19 настай байсан ангийнхаа Коллин Слеммер гэдэг охиныг Теннесси муж улсын Ноксвилл хот дахь мэргэжлийн сургалтын төвийн ойролцоох ой руу хуурч авчран, тамлан зовоож хөнөөсөн байна.

Уг хэрэг тухайн үед хэвлэл мэдээллийн хэрэгслүүдийн анхаарлыг ихээхэн татаж байв. Хэрэг үйлдэгчид хохирогчийн цээжин дээр пентаграмын дүрс сийлж, мөн гавлын ясных нь хэсгийг "дурсгал" болгон авч явсан байжээ.

Шүүх хурлын үеэр өгсөн мэдүүлгүүдээс үзэхэд Пайк хохирогчийг өөрийнх нь өрсөлдөгч гэж үздэг байжээ.

Пайк, Шипп нарыг нэгдүгээр зэргийн хүн амины хэрэгт буруутгаж, Пайкт цаазаар авах ял, Шиппт хугацаанаас өмнө суллагдах боломжтойгоор бүх насаар нь хорих ял оноосон байна. 

Одоогоор Пайк нь Теннесси муж улсын эмэгтэйчүүдийн хорих ангийн цаазын ял сонссон цорын ганц хоригдол аж.