“Фулбрайт”-ын 80 жил, Монгол Улсад хэрэгжиж эхэлсний 30 жилийн ойн баярын үйл ажиллагаа боллоо.

Уг үйл ажиллагаанд Боловсролын яамны Төрийн нарийн бичгийн дарга Т.Ням-Очир, Америкийн Нэгдсэн Улсаас Монгол Улсад суугаа Элчин сайдын яамны Хатагтай Эмма Ломакс болон төлөөлөгчид, үе үеийн Фулбрайт хөтөлбөрийн төгсөгчид оролцов.

Америкийн Нэгдсэн Улсад 1946 онд анх хууль баталснаар үндэс нь тавьсан тус хөтөлбөр дэлхийн 160 гаруй улс орныг хамарсан хамгийн том боловсролын салбарын түншлэл болон өргөжжээ. Монгол Улсын хувьд 1992 онд анхны оюутан болох Ардын багш Б.Жадамбаа АНУ-ыг зорьсноор энэхүү түүх эхэлсэн ба өнөөдөр хоёр орны боловсролын хамтын ажиллагааны тулгын чулуу хэвээр байна.

2010 онд Монгол Улсын Засгийн газар, АНУ-ын Засгийн газар хооронд хамтарсан Фулбрайтын Гадаад оюутны хөтөлбөр байгуулах хэлэлцээрт гарын үсэг зурснаар манай улс уг хөтөлбөрт өөрийн төсвөөс санхүүжилт оруулдаг цөөн тооны түншлэгч орны нэг болсон юм. Энэхүү хамтарсан хөтөлбөрөөр өнөөдрийг хүртэл 150 гаруй монгол залуус боловсрол, байгаль орчин, нийгмийн эрүүл мэнд, геологи, уул уурхайн инженерчлэл зэрэг эх орны хөгжилд нэн шаардлагатай чиглэлээр АНУ-ын шилдэг их сургуулиудад магистрын зэрэг хамгаалжээ.

Үйл ажиллагааны үеэр Боловсролын яамны Төрийн нарийн бичгийн дарга Т.Ням-Очир үг хэлж, Фулбрайт хөтөлбөрийн үе үеийн төгсөгчдийг хоёр улсын нөхөрсөг харилцааны төлөөлөгчид, боловсролын элч гэдгээ ухамсарлан ажиллахыг хүсээд, АНУ-ын Тусгаар тогтнолын 250 жилийн ой болон Фулбрайт хөтөлбөрийн 80 жилийн ойн мэндийг АНУ-ын ард түмэн, Элчин сайдын яамны хамт олонд хүргэлээ.