/Reuters/ Австри улсад лхагва гаригт агаарын хэм түүхэн дээд хэмжээнд хүрч, аагим халуун, ган гачгийн улмаас төв болон өмнөд Европт хүндрэл үүсэж, Унгар улсад эрчим хүчний хэрэглээг хязгаарлажээ.
Дэлхийд хамгийн хурдан дулаарч буй Европ тивд энэ зун түүхэнд үзэгдээгүйгээр халж, Франц, Испани улсууд түймрийн гамшигт өртөөд байна. Аагим халуун агаарын урсгал зүүн зүгт шилжиж, Италийн зарим нутагт цельсийн +40 хэм (Фаренгейтийн 104 градус) хүрсэн тул томоохон хотуудад улаан түвшний сэрэмжлүүлэг зарлажээ. Албани улсын онцгой байдлын албаныхан Маллакастер мужийн өмнөд хэсэгт дэгдсэн ойн түймрийг унтраахаар ажиллаж байна.
Хэт халуунаас болж Ватиканы Пап лам Лео долоо хоног тутмын айлтгалаа Ариун Петрийн талбайд бус харин дотор танхимд хийхээс аргагүйд хүрчээ. Ромд ирсэн жуулчид энэ шийдвэрийг "бүгчим халуунаас түр боловч зугтах боломж" хэмээн талархан хүлээн авчээ. Мексикээс ирсэн жуулчин Диего Амая ярихдаа "халуун байгаа учраас дотор зааланд хийх нь дээр байх гэж бодож байна" гэлээ.
Үндэсний цаг уурын “GeoSphere Austria” алба Словактай залгаа хилийн орчимд орших Австрийн Бад Дойч-Альтенбург хотод агаарын хэм +41.2 °C (106.2 Фаренгейт) хүрснийг бүртгэжээ. Өмнө нь мягмар гаригт Вена хотын орчимд +41.0 °C хүрч халсан байна.
