/KYODO/ Олимпын түүхэнд дээд амжилт тогтоож, 10 медаль хүртсэн ойрын зайн тэшүүрчин Михо Такаги өчигдөр Токиод болсон хүлээн авалтын үеэр Ерөнхий сайд Санаэ Такаичигаас Ард түмний хүндэтгэлийн шагналыг гардан авчээ.
Энэхүү хүндтэй шагналыг өдгөө 32 настай Такаги дөрөвдүгээр сард их спортоос зодог тайлна гэж зарласныхаа дараа хүлээн авч буй юм. Тэрбээр тамирчны замналдаа дөрвөн өвлийн Олимпод оролцож, нийт 10 медаль (хоёр алт, дөрвөн мөнгө, дөрвөн хүрэл) хүртсэнээр зуны болон өвлийн Олимпод оролцсон Японы эмэгтэй тамирчдын дотроос хамгийн олон медалийн эзэн болжээ.
Хоккайдо мужид төрсөн Такаги 15 настайдаа 2010 оны Ванкуверын Олимпод анх оролцсон байна. Тэрбээр хоёр алтан медалиа 2018 оны Пёнчаны өвлийн Олимпын эмэгтэйчүүдийн багийн тэмцээнд эгч Нанагийн хамт, мөн 2022 оны Бээжингийн өвлийн Олимпод 1000 м-ийн зайд тус тус авчээ.
Өнгөрсөн хоёрдугаар сард Милан-Кортинагийн Олимпын наадамд оролцсон Такаги 500 м, 1000 м болон багийн гэсэн гурван төрөлд хүрэл медаль хүртсэн юм. Мөн тэрбээр тамирчны замналаа дуусгах үедээ Дэлхийн цомын тэмцээнд ганцаарчилсан төрөлд 38 удаа түрүүлж, эмэгтэйчүүдийн 1500 м-ийн зайд дэлхийн дээд амжилтыг тогтоосон байна.
Ард түмний хүндэтгэлийн шагналыг 1977 оноос хойш гардуулж эхэлснээс хойш уг шагналыг хүртсэн 29 дэх хүн нь Такаги болж байна. Уг шагналыг спорт, урлаг, соёлын салбарт гаргасан амжилтыг нь үнэлж 28 хүн болон нэг багт олгожээ.
Энэхүү шагналыг хамгийн сүүлд 2023 оны гуравдугаар сард тэргэнцэртэй теннисчин Шинго Куниеда хүртсэн юм.
