Хиймэл оюуныг нэвтрүүлснээр ажлын байр одоогоор цөөрөөгүй байгаа хэдий ч цаашдаа залуу хүмүүс ажилд ороход нөлөөлөх магадлал байгааг "Anthropic" компанийн тайланд дурджээ. Тус компани хиймэл оюун ухаан нь хөдөлмөрийн зах зээлд хэрхэн нөлөөлж буйг судалсан байна.
Судлаачид хиймэл оюуны системүүдийн гүйцэтгэж чадах ажлуудын талаарх мэдээлэл болон одоо бодитоор гүйцэтгэж байгаа ажлуудын талаарх өгөгдлүүдэд дүн шинжилгээ хийснээр тухайн ажил мэргэжлийн хэдэн хувийг хиймэл оюун гүйцэтгэж байгааг тооцоолон гаргасан байна.
Тайланд дурдсанаар, онолын хувьд хиймэл оюуны гүйцэтгэж чадах олон ажил бодит байдал дээр хийгдэхгүй байна. Тухайлбал, компьютер, математикийн чиглэлээр хиймэл оюун нь ихэнх ажлыг гүйцэтгэх боломжтой боловч одоогоор гуравны нэг орчмыг нь гүйцэтгэж байгаа аж.
Хиймэл оюуны технологийн нөлөөнд хамгийн ихээр өртөх магадлалтай мэргэжлүүдийн тоонд программ зохиогч, харилцагчид үйлчлэх ажилтнууд, өгөгдөл оруулах операторын мэргэжлүүд орж байна. Харин тогооч, засварчин, аврагч, бармен, аяга таваг угаагч зэрэг биеийн хөдөлмөр шаардсан эсвэл хүмүүстэй шууд харилцдаг ажил мэргэжлүүд хиймэл оюуны нөлөөнд үндсэндээ өртөөгүй хэвээр байна.
2022 онд "ChatGPT" хэрэглээнд нэвтэрснээс хойш хиймэл оюунд хамгийн их ба хамгийн бага хэмжээгээр өртөх магадлалтай мэргэжлүүдийг харьцуулан судлахад ажилгүйдлийн түвшин ерөнхийдөө ижил үзүүлэлттэй байв.
Гэсэн хэдий ч ажилд авахад нөлөөлж эхэлж буйг илтгэх эхний шинж тэмдгүүд ажиглагдаж байна. Тухайлбал, 22-25 насны залуусыг хиймэл оюуныг өргөнөөр ашиглаж байгаа салбаруудад ажилд авах нь багассаныг судалгаа харуулжээ. 2024 оноос хойш залуусын шинээр ажилд орж буй түвшин 2022 оныхтой харьцуулахад 14 орчим хувиар буурсан байна.
Эдгээр өөрчлөлт нь одоогоор багахан хэмжээнд байгаа нь өөр шалтгаантай байх болох юм. Залуусын зарим нь одоогийн ажлын байрандаа илүү удаан ажиллах, өөр мэргэжил сонгох эсвэл үргэлжүүлэн суралцах хүсэлтэй байж болно.
Судалгаанд дурдсанаар, хиймэл оюуны нөлөөнд хамгийн их өртөж байгаа мэргэжлүүдийг эзэмшсэн хүмүүс ихэвчлэн нас ахисан, боловсрол өндөртэй, илүү өндөр цалинтай байгаа бөгөөд тэдний орлого нь хиймэл оюуны нөлөөнд бага өртөмтгий мэргэжлийн ажилтнуудынхтай харьцуулахад дунджаар 47 хувиар илүү байна.
Эх сурвалж: Kazinform
