Сүхбаатар дүүргийн 13 дугаар хороонд барьсан спорт цогцолборын барилгын ажил дуусаж, улсын комисс ажиллан байнгын ашиглалтад хүлээн авлаа.

Нийслэлийн Хөрөнгө оруулалтын газраас тус спорт цогцолборын барилгад захиалагчийн техникийн хяналтыг хэрэгжүүлэн ажилласан байна. Бүтээн байгуулалтын барилга угсралтын ажлыг “Билгүүн монгол констракшн” компани гүйцэтгэсэн бөгөөд спорт цогцолбор ашиглалтад орсноор тус дүүргийн иргэд биеийн тамир, спортоор тогтмол хичээллэж, чөлөөт цагаа зөв боловсон өнгөрүүлэх, эрүүл идэвхтэй амьдралын хэв маягийг хэвшүүлэх таатай орчин бүрдлээ. 29.9 мянган ам метр талбайд хэрэгжсэн энэхүү цогцолбор нь олон улсын тэмцээн зохион байгуулах стандартын шаардлагад нийцсэн гурван давхар спортын барилга болон гадна талбайн иж бүрэн тохижилтоос бүрджээ. Гадна талбайд хөлбөмбөг, газрын теннис, сагсан бөмбөгийн талбай, гүйлтийн болон дасгалын зам, хүүхдийн тоглоомын талбай, амралтын бүс, ногоон байгууламж, усан оргилуур, автомашины зогсоол, гэрэлтүүлэг зэрэг шийдлийг багтаасан байна.

Спорт цогцолборын нэгдүгээр давхарт ширээний теннис, фитнесс, боксын заал, хурлын танхим, хувцас солих болон бэлтгэлийн өрөө, хоолны заал, агуулах зэрэг шаардлагатай хэсгүүдийг шийджээ. Харин хоёрдугаар давхарт үндсэн сагсан бөмбөгийн заал, заалны хөлбөмбөг, волейбол зэрэг спортоор хичээллэх олон зориулалтын заал болон хананд авиралтын хэсгийг байгуулсан байна. Тэгвэл гуравдугаар давхарт үзэгчдийн суудал, камер болон шүүгчийн өрөө, ашиглалтад зориулсан дээврийн талбайг тохижуулсан аж.

Тус спорт цогцолбор ашиглалтад орсноор Сүхбаатар дүүргийн 140 гаруй мянган иргэн спортоор хичээллэх, чөлөөт цагаа зөв боловсон өнгөрүүлэх, эрүүл амьдралын хэв маягийг хэвшүүлэх боломж бүрдэх юм. Мөн биеийн тамир, хүүхдийн тоглоомын талбай, амралтын бүс, авто болон дугуйн зам, автомашины зогсоол, ногоон байгууламжийг нэг дор шийдсэнээрээ онцлогтой.