/TASS/ “Алтан бөмбөг” шагналыг найман удаа хүртсэн Лионель Месси Аргентины шигшээ багийн бүрэлдэхүүнд сүүлчийн удаа дуудагдсан тухай тус улсын Хөл бөмбөгийн холбооны хэвлэлийн алба мэдээлсэн байна.

Л.Месси шигшээ багаасаа зодог тайлж байгаагаа наймдугаар сарын 31-нд мэдэгдсэн юм. Аргентины шигшээ баг Боливийн шигшээ багтай есдүгээр сарын 30-нд, Буркина-Фасогийн багтай аравдугаар сарын 3-нд, Бениний шигшээтэй аравдугаар сарын 6-нд нөхөрсөг тоглолт хийнэ. Л.Месси багийнхаа сүүлийн нөхөрсөг тоглолтод оролцох ажээ. 

“Бид дэлхийн шилдэг тоглогч, манай багийн ахлагч Лионель Мессиг аравдугаар сарын 6-нд Аргентинд багтаа сүүлчийн тоглолтоо хийхийг урьсан” гэж Аргентины Хөл бөмбөгийн холбооны ерөнхийлөгч Клаудио Тапиа мэдэгдсэн байна.

39 настай Л.Месси 2023 оноос Хойд Америкийн тэргүүн лигийн /MLS/ “Интер Майами” клубт тоглож байгаа. Европт Францын “Пари Сен-Жермен”, Испанийн “Барселона” багуудад тоглож байсан бөгөөд “Барселона”-гийн бүрэлдэхүүнд Аваргуудын лигт дөрвөн удаа, УЕФА-гийн Супер цом болон Клубүүдийн дэлхийн аварга шалгаруулах тэмцээнд тус бүр гурван удаа түрүүлжээ. Тэрбээр мөн 2022 оны дэлхийн аварга, 2014, 2026 оны дэлхийн аваргын мөнгөн медальт, 2008 оны олимпын аварга, “Копа Америка” тэмцээний 2021, 2024 оны аварга юм. Түүнчлэн “Алтан бөмбөг” шагналыг хамгийн олон удаа хүртсэн амжилтын эзэн билээ.

Л.Месси Аргентины шигшээгийн бүрэлдэхүүнд 207 тоглолтод оролцохдоо 125 гоол оруулсан бөгөөд эдгээр үзүүлэлтээр шигшээ багийнхаа дээд амжилтыг эзэмшдэг. Тэрбээр ДАШТ-д зургаан удаа оролцсон байна.