Маш хүчтэй хар салхийг тэсвэрлэж чадах 50 МВт-ын хүчин чадалтай, дэлхийд хамгийн томд тооцогдох хөвдөг салхин турбинуудыг суурилуулахаар төлөвлөж байгаагаа Хятадын Mingyang Smart Energy компани зарлан мэдэгдлээ.
Тус компани салхин генераторын үйлдвэрлэлээр Хятадад тэргүүлдэг юм.
Өмнө нь ашиглаж байсан OceanX тавцан дээр суурилуулах хоёр талт V хэлбэрийн байгууламж нь тус бүр 25 МВт-ын хүчин чадал бүхий хоёр хөдөлгүүртэй бөгөөд одоо ажиллаж буй хөвдөг турбиныхаас хоёр дахин илүү хүчин чадалтай гэсэн үг юм.
Компанийн олон улсын бизнесийн асуудал эрхэлсэн захирал Жан Циний ярьснаар “хоёр толгойт” турбины ротор тус бүр нь 290 м урт ажээ. Компанийн ерөнхий захирал Жан Чуанвэйгийн ярьснаар, турбиныг тун удахгүй үйлдвэрлэж эхлэх ба 2026 оноос бөөнөөр нь үйлдвэрлэнэ. Хоёр толгойт турбины нэг киловаттад ногдох өртөг 1300 доллар байгаа нь Европ ба Хятадын дундаж үзүүлэлтээс нэлээд доогуур ажээ.
Мөн 100 м-ийн гүн усанд суурилуулах тавцан нь 260 км/цагийн хурдтай тав дахь түвшний хүчтэй хар салхийг тэсвэрлэнэ. V хэлбэрийн цамхаг, Y хэлбэрийн хөвөгч суурь нь гүнзгий усанд тогтвортой, үр ашигтай ажиллах боломжийг хангана.
Түүнээс гадна, Mingyang Smart Energy компани Их Британи, Европын зах зээлд нэвтрэхийн тулд Шотландад 1,8 тэрбум доллароор салхины эрчим хүчний шинэ объектыг барьж байгаа ажээ.
Эх сурвалж: new-science.ru
