/Синьхуа/. Хятад улсын төрийн байгууллагууд газрын ховор металлуудын олборлолт, хайлуулах, ялган боловсруулах үйл явцыг илүү хатуу хяналттай болгох түр дүрэм журмыг гаргасан байна. Энэхүү баримт бичгийг Аж үйлдвэр, мэдээлэлжүүлэлтийн яам, Хөгжил шинэчлэлийн улсын хороо, Байгалийн нөөц баялгийн яам хамтран боловсруулжээ.
Журмын дагуу газрын ховор металлын олборлолт, хайлуулах, ялган боловсруулах хэмжээг жил бүрийн квотоор тогтоож, уг квотуудыг уурхай, үйлдвэрүүдэд хуваарилах юм. Энэ нь үндэсний эдийн засгийн хөгжлийн зорилтууд, нөөцийн хэмжээ, салбарын хөгжил, байгаль орчинд үзүүлэх нөлөө болон зах зээлийн эрэлт зэрэг хүчин зүйлсэд тулгуурлан тооцогдох ажээ.
Үйлдвэр, аж ахуйн нэгжүүд зөвхөн батлагдсан квотын хүрээнд олборлолт явуулах бөгөөд бүтээгдэхүүний урсгалын мэдээллийг үнэн зөвөөр гаргаж, мэдээллийн системд бүртгүүлэх үүрэгтэй. Квотын хэрэгжилтэд тавих хяналтыг чангатгаж, зөрчил гаргасан тохиолдолд хуулийн дагуу таслан зогсоохыг орон нутгийн эрх баригчдад даалгасан байна.
Газрын ховор металлын жагсаалтад 17 элемент багтдаг бөгөөд эдгээр нь хавтгай дэлгэцтэй телевизор, хос тэжээлтэй автомашин зэрэг өндөр технологийн бүтээгдэхүүн үйлдвэрлэлд зайлшгүй ашиглагддаг стратегийн чухал түүхий эд юм.
Эх сурвалж: Синьхуа
