Япон улс Минамиторишима арлын эрэг орчим дахь далайн ёроолоос газрын ховор металл олборлох төслийг 2026 оноос хэрэгжүүлэхээр төлөвлөж буйг Nikkei Asia сонин мэдээллээ. Уг төслийн хүрээнд 5500 метрийн гүнээс тусгай өрөмдлөгийн хөлөг онгоцоор лаг шавар сорох замаар ховор металл олборлож, цуглуулсан шаврыг эх газарт авчран боловсруулах аж. Энэ нь дэлхийд анх удаа ийм хэт гүнээс ховор металл олборлож буй туршлага болохоор онцлогтой юм.
Японы Далайн болон газрын шинжлэх ухаан, технологийн агентлагийн (JAMSTEC) тооцоолсноор нэг тонн лаг шаварт дунджаар хоёр килограмм ховор металл агуулагддаг бөгөөд зөвхөн Минамиторишима арлыг тойрсон бүс нутагт нийт 16 сая тонн орчим ховор металлын нөөц илэрсэн байна. Энэ нь хэмжээгээрээ дэлхийд гуравдугаарт бичигдэх томоохон нөөц бөгөөд цахилгаан автомашины үйлдвэрлэлд хэрэглэгддэг диспрозийн өндөр агууламжаас гадна цөмийн эрчим хүчний салбарт нэн чухал элемент болох гадолинийг их хэмжээгээр агуулж байгаа аж.
Түүнчлэн Япон улс ховор металлын олборлолтын дэлхийн 70 орчим хувийг дангаараа бүрдүүлдэг Хятадаас хамааралтай байдлаа бууруулах зорилгоор энэхүү шинэ технологийг эрчимтэй хөгжүүлж байгааг тэмдэглэжээ.
Эх сурвалж: Nikkei Asia
