Европ даяар “хэт олон жуулчин”-ы эсрэг эсэргүүцлийн давалгаа өрнөж байна. Орон нутгийн иргэд олноор ирж буй жуулчид нь орон сууцны үнийг хөөрөгдөж, өөрсдийг нь өөрийнх нь дүүргээс шахан гаргаж байгааг гомдоллон, эсэргүүцлээ илэрхийлж эхэлжээ. Associated Press агентлаг энэ талаар мэдээлжээ.

Жуулчлалын ачаалалтай холбоотой хамгийн тод жишээ бол Парисын Луврын музейн хаалт байв. Жуулчдын урсгал хэт нэмэгдсэнээр ажилчдын ачаалал тэсвэр хэтэрч, тэд ажил хаялт зарласан байна. Үүний улмаас урьдчилан тасалбар захиалсан хэдэн мянган жуулчин музейн гадаа бөөгнөрөн зогсож байгаа нь тухайн өдрийн хамгийн шуугиантай зургуудын нэг болжээ.

Түүнчлэн Өмнөд Европ даяар, тухайлбал Испани, Итали, Португаль зэрэг орнуудад жуулчдын эсрэг олон нийтийн жагсаал өрнөсөн байна. Барселон, Неаполь, Венеци, Лиссабон, Майорка, Ибица зэрэг жуулчдын хөлд дарагдсан хотуудын оршин суугчид “хотынхоо амьдралыг буцаан авах” шаардлага тавьж, эсэргүүцлээ илэрхийлсэн юм.

Итали улсад гэхэд л 1500 өрөөтэй хоёр зочид буудал барих төслийг эсэргүүцэн жагсагчид тэмцэл өрнүүлсэн байна. Жуулчдын тоо нэмэгдэхийн хэрээр түрээсийн байрны үнэ өсч, орон сууцны хомсдол бий болсон нь орон нутгийн иргэдийн гол бухимдлын шалтгаан болжээ.

Жагсагчид мөн хувийн онгоц, тансаг хөлөг онгоцоор аялж буй цөөнхийн аяллыг хязгаарлах, аяллын зохистой бодлого нэвтрүүлэхийг шаардсан байна.

Жуулчлалын төв болсон Барселон хот 1.6 сая оршин суугчтай ч 2023 онд 26 сая жуулчин хүлээн авсан нь оршин суугчдынхаа тооноос даруй 16 дахин олон хүнтэй нүүр тулсан үзүүлэлт болжээ. Жагсаалд оролцогчид “Жуулчид гэртээ харь” гэх уриа барьж, аялал жуулчлалын хэт ачаалал, үл хөдлөх хөрөнгийн хөөрөгдөл, орон зайн булаан эзлэлтийн эсрэг дуу хоолойгоо илэрхийлж байна.

Эх сурвалж: Associated Press, OfficeLife.media