Монгол Улсад жилийн дөрвөн улиралд тогтвортой ногоо бэлтгэн нийлүүлэх боломжийг бүрдүүлж, хүнсний аюулгүй байдал, хөдөө аж ахуйн тогтвортой байдлыг хангах стратегийн чухал зорилгоор Үндэсний ухаалаг хүлэмжийн цогцолборын шав тавих ёслол боллоо. Энэхүү цогцолбор нь улсын хүнсний хангамжийн тогтвортой байдлыг бэхжүүлэхэд томоохон хувь нэмэр оруулах юм.

Ухаалаг хүлэмжийн цогцолборын төслийг Баянзүрх дүүргийн 11 дүгээр хорооны нутаг дэвсгэрт байгуулахаар төлөвлөж байгаа бөгөөд ойролцоогоор 3.42 сая ам.долларын төсвөөр хэрэгжинэ. Уг төслийг Хүнс, хөдөө аж ахуй, хөнгөн үйлдвэрийн яам (ХХААХҮЯ), Хүнс, хөдөө аж ахуй, хөнгөн үйлдвэрийн судалгаа хөгжлийн төв, БНСУ-ын “Хангён” үндэсний их сургууль, Солонгосын Хөдөө аж ахуйн хамтын ажиллагааны газар (KOICA) хамтран 2025-2029 онд хэрэгжүүлэхээр болжээ.

Энэхүү хүлэмжийн цогцолбор нь хүнсний ногооны судалгааны төв, сургалтын танхим, хүнсний ногоо боловсруулах цех, бараа материалын агуулах зэрэг олон төрлийн дэд бүтцийг өөртөө багтаана. Түүнчлэн, дэвшилтэт, дунд технологийн болон хойд бүсийн хүлэмжүүд, босоо тариалангийн контейнер, ил талбайн ухаалаг аж ахуй, хөдөө аж ахуйн технологийн паркаас бүрдсэн иж бүрэн цогцолбор байна.

ХХААХҮЯ-ны мэдээлснээр, төслийн хүрээнд ухаалаг хүлэмжийн аж ахуй эрхлэх, тариалалтын технологийн онолын сургалт зохион байгуулахаас гадна онол, талбайн сургалтыг үе шаттай явуулж, мэргэжилтэн, судлаач, тариаланчдад зориулсан уулзалт, семинарыг жил бүр тогтмол зохион байгуулах юм.

Төсөл хэрэгжсэнээр Монгол Улсын хөдөө аж ахуйн технологийн чадавх мэдэгдэхүйц сайжирч, хүнсний ногоог жилийн турш тогтвортой үйлдвэрлэх бааз суурь бүрдэнэ. Үүнээс гадна, тариаланчдын орлого нэмэгдэж, орон нутгийн эдийн засаг сэргэх, уур амьсгалын өөрчлөлтөд дасан зохицсон газар тариалангийн дэвшилтэт технологи нэвтрэх зэрэг олон талын ач холбогдолтой гэж үзэж байна.

Эх сурвалж: Хүнс, хөдөө аж ахуй, хөнгөн үйлдвэрийн яам