Зохиогчийн эрхийн асуудлаар хиймэл оюун ухааны салбар дахь маргаан улам ширүүссээр байна. Энэ удаа дэлхийн хамгийн том кино студиудын нэг болох Disney болон Universal компаниуд AI дүрслэл үүсгэгч Midjourney-н бүтээлүүдийг зохиогчийн эрх зөрчсөн хэмээн үзэж, АНУ-ын Калифорнийн Төв тойргийн шүүхэд нэхэмжлэл гаргасан тухай BBC болон OfficeLife мэдээллээ.

Гомдолд дурдсанаар, Midjourney-г "хуулбарлалтын ёроолгүй нүх" хэмээн нэрлэжээ. Учир нь тус хиймэл оюун ухааны систем Дарт Вейдер, Миньон зэрэг олон алдартай дүрийг зөвшөөрөлгүй, олон арван хувилбараар дүрслэн гаргаж буй нь зохиогчийн эрхийг шууд зөрчиж байна гэж үзжээ. Компаниуд Midjourney-ийн үүсгэн байгуулагчдаас санхүүгийн нөхөн төлбөр нэхэмжлэн, цаашид зохиогчийн эрх бүхий контент ашиглахгүй байхыг шаардсан байна.

Midjourney нь 2024 онд л гэхэд 300 сая ам.долларын хөрөнгө босгосон бөгөөд удалгүй AI видео үйлчилгээ нээх төлөвлөгөөтэй байгааг мөн шүүхэд өгсөн гомдолд онцолжээ. Энэ нь зөвхөн зургаар хязгаарлагдахгүй, одоо бүрэн хэмжээний киноны чанартай дүрслэл, хөдөлгөөнт дүрсийг хуулбарлах боломжтой болохыг заасан шинжээчид анхааруулж байна.

Энэхүү хэрэг нь зөвхөн Midjourney бус, AI бүтээх бүх системд хамааралтай томоохон шүүхийн шийдвэрт хүрч мэдэх юм. AI хөгжүүлэлт ба оюуны өмчийн хоорондын эрх зүйн зааг, хязгаарыг тодорхойлох, цаашид хэн, ямар нөхцөлөөр хиймэл оюун ухаанд сургалтын өгөгдөл болгон уран бүтээлийг ашиглаж болох вэ гэсэн маргааны нэг том жишээ болон үлдэх магадлалтай байна.

Эх сурвалж: officelife.media, BBC