Uber компани ирэх хавар Лондон хотод жолоочгүй, бүрэн автономит таксиг туршиж эхлэхээр боллоо. Энэхүү туршилт нь Их Британийн хиймэл оюун ухааны Wayve компанитай хамтран хэрэгжих бөгөөд одоогоор хууль эрх зүйн хүрээнд хүний хяналттайгаар туршиж байгаа аж.
Засгийн газраас анх 2026 онд жолоочгүй тээврийн хэрэгслийг ашиглах төлөвлөгөөтэй байсан ч дараа нь хугацааг 2027 он руу хойшлуулсан. Гэвч хамгийн сүүлд энэ төрлийн жижиг оврын "автобус, такси" хэлбэрийн үйлчилгээний хууль эрх зүйн орчныг түргэвчилсэн журмаар бий болгохоо зарласан нь замын хөдөлгөөнд ийм машин эрт гаргах нөхцөлийг бүрдүүлжээ.
Uber-ийн туршилтын машин үйлчлүүлэгчдэд нээлттэй эсэх нь одоогоор тодорхойгүй байна. Гэвч хууль эрх зүйн нөхцөл бүрдвэл Uber аппликейшнд жолоочгүй такси нь жирийн сонголт болж нэмэгдэхээ өмнө нь мэдэгдэж байсан. Британийн Тээврийн яамны тооцоолсноор энэ салбар 2035 он гэхэд 38 мянган ажлын байр бий болгож, улсын эдийн засагт 42 тэрбум фунт стерлингийн нэмэр оруулах боломжтой гэжээ. Гэсэн ч GMB холбооны төлөөлөгч Энди Прендергастын хэлснээр жолоочгүй тээвэр нь ажилгүйдэл зэрэг нийгмийн олон талт нөлөөг авчрах тул энэ талаар бүрэн дүгнэлт хийх хэрэгтэйг анхааруулсан байна.
Uber энэ оны гуравдугаар сард АНУ-ын Остин хотод жолоочгүй таксигийн үйлчилгээг эхлүүлж, долоо хоногийн долоон өдөр, өдөрт хорин цаг тасралтгүй ажиллуулж байна. Үйлчлүүлэгчид тухайн машин боломжтой бол сонгож суух боломжтой бөгөөд тийзний үнэ нь энгийн такситай ижил юм. Тесла ч мөн энэ хотод ирэх сараас адил төрлийн үйлчилгээг нэвтрүүлэхээр төлөвлөжээ.
Бүрэн жолоочгүй автомашинууд Хятад, АНЭУ, Сингапур зэрэг улсад сая сая километр замыг туулсан бөгөөд зарим судалгаагаар хүний жолоодлоготой харьцуулахад ослын магадлал бага гэжээ. Гэсэн ч зарим тохиолдолд зам тээврийн осол, зорчигчийг дотроос нь гаргахгүй түгжих зэрэг асуудал гарч байсныг ч дурджээ. Сан Францискод үйл ажиллагаагаа зогсоосон тохиолдол ч бий.
Сурвалжлагч Лондоны төвд Wayve-ийн системтэй жолоочгүй машинд сууж, хажууд нь зөвхөн хяналтын үүрэгтэй хүн суусан байхад 30 минутын турш түгжрэл, гэрэл дохио, дугуйтай зорчигч, зам дээрх таягтай явган зорчигч гээд бүх нөхцөлд машиныг ямар ч алдаа гаргалгүй явсныг онцолсон байна. Ford Mach-e загварын энэхүү машин нь радар, мэдрэгчүүдтэй бөгөөд бодит цагийн хиймэл оюун ухаанд суурилсан хариу үйлдлээр бүрэн хянагдаж байсан аж.
Эх сурвалж: BBC, Variety, The Guardian
