Японы видео тоглоомын салбарын тэргүүлэгч “Nintendo” компани сүүлийн найман жилд анх удаа шинэ үеийн тоглоомын консол болох “Switch 2”-оо өнөөдрөөс хэрэглэгчдэд хүргэж эхэллээ. Урьдчилсан захиалгын эрэлт маш өндөр байгаагаас харахад энэхүү төхөөрөмж нь компанийн санхүүгийн үр дүнд мэдэгдэхүйц ахиц авчрах төлөвтэй байна.

Киото хотод төвтэй тус компани 2025 оны гуравдугаар сар хүртэлх санхүүгийн жилд нийт 15 сая ширхэг “Switch 2” консолийг дэлхий даяар борлуулах зорилт тавиад байгаа бөгөөд урьдчилсан захиалга тухайн үеийн хүлээлтээс давсан гэж мэдэгдсэн. Зөвхөн Япон улсад худалдаанд гарсан даруйд сугалаанд оролцсон хүмүүсийн тоо 2.2 саяд хүрсэн нь зах зээлийн өндөр хүлээлтийг илтгэж байна.

Шинэ “Switch 2” загвар нь 2017 онд гарсан анхны “Switch”-ээс илүү хүчирхэг үзүүлэлттэй. Тухайлбал:

• 4K форматыг дэмждэг

• дэлгэцийн нягтаршил хоёр дахин сайжирсан

• олон хэлний дэмжлэгтэй хувилбар 69,980 иен, зөвхөн япон хэлтэй нь 49,980 иен буюу ойролцоогоор 350 ам.долларын үнэтэй худалдаалагдаж байна

Мөн “Switch 2”-той зэрэгцэн компанийн нэрийн хуудас болсон “Mario Kart World” шинэ хувилбар танилцуулагдсан нь хэрэглэгчдийн анхаарлыг улам нэмэгдүүлжээ.

Эрэлт ийм өндөр байгаа нөхцөлд “Nintendo” 2025 оны борлуулалтын төлөвөө өмнөх жилийнхээс 63.1 хувиар өсгөж, нийт орлогыг 1.9 их наяд иенд хүрнэ гэж тооцоолсон байна. Компанийн ерөнхийлөгч Шүнтаро Фүрүкава үйлдвэрлэлийн хэмжээг нэмэгдүүлэхээр ажиллаж буйгаа мөн дурдсан.

Анхны “Switch” консол нь нийт 150 сая гаруй ширхэг борлогдож, компанийн хамгийн амжилттай бүтээгдэхүүний нэгээр нэрлэгдэж байсан. Харин 2020 онд оргил үедээ 28.8 сая ширхэг борлуулалттай байсан ч сүүлийн жилүүдэд уг тоо буурах хандлагатай болсон нь “Switch 2”-ийн танилцуулгыг оновчтой цаг үед хийсэн стратеги болохыг харуулж байна.

Эх сурвалж: Kyodo News