Нийслэлийн ИТХ-ын дарга А.Баяр БНСУ-ын “MGIS” компанийн захирал Ким Жун Вү, ахлах инженер Хан Сун Ён нарыг хүлээн авч уулзан, авто замын түгжрэлийн гол шалтгааны нэг болох зам тээврийн ослын асуудлыг дрон болон хиймэл оюун ухааны тусламжтайгаар хэрхэн хурдан, үр дүнтэй шийдвэрлэх талаар санал солилцлоо.

Нийслэлд гарч буй зам тээврийн ослын 80 орчим хувь нь хоёр автомашин шүргэлцсэн, хөнгөн хэлбэрийн осол байдаг бөгөөд ийм дуудлагад цагдаа нар ослын газар түгжрэлээс хамааран 15-40 минутын дараа очиж, хэмжилт, бүртгэл хийхэд дахиад дор хаяж 30 минут зарцуулдаг. Зарим тохиолдолд энэ хугацаа хоёр цаг хүрэх нь ч бий. Үүний улмаас тухайн орчинд түгжрэл улам бүр нэмэгдэж, замын хөдөлгөөний урсгалд томоохон сөрөг нөлөө үзүүлдэг талаар уулзалтад оролцогчид онцолсон юм.

НИТХ-ын дарга А.Баяр “Хоёр машин шүргэлцсэн ослыг 5-10 минутын дотор шийдэх технологийн шийдэл хайж байна. Замын цагдаа заавал очихгүйгээр дроноор тухайн ослын газрыг хянан зураг авч, мэдээллийг систем рүү илгээх, улмаар хиймэл оюун ухаанаар боловсруулан хэн буруутай, хэдэн төгрөгийн хохирол гарсныг тогтоох боломжийг бүрдүүлэхийг зорьж байна” гэв. Мөн жолооч нар ч өөрсдөө ослын зургаа систем рүү илгээж болох бөгөөд үүний тулд дүүрэг бүрт замын хөдөлгөөний удирдлагын төвөөс удирддаг дроны систем шаардлагатай байгааг онцоллоо.

“MGIS” компанийн зүгээс БНСУ-д замын хөдөлгөөний аюулгүй байдлын газартай хамтран ажиллаж, дроны зураг авалт, систем хөгжүүлэлт болон борлуулалтын чиглэлээр мэргэшсэн туршлагатай гэдгээ хэлж, “Дроныг ослын газар ашигласнаар цаг хугацааг 60-70 хувиар хэмнэж байгаа үр дүн бий. Монголд ийм систем нэвтрүүлэх боломжтой. Эхний ээлжид дата цуглуулах, судалгаа, туршилт хийх шаардлагатай ч хамтран ажиллахад бэлэн” гэдгээ илэрхийлэв.

Энэхүү санаачилга нь дэвшилтэт технологийг нийслэлийн замын хөдөлгөөний зохион байгуулалтад нэвтрүүлж, иргэдийн цаг хугацаа, эдийн засгийг хэмнэх, замын түгжрэлийг бууруулах шинэ шийдэл болох төлөвтэй байна.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс