Америкийн “Blue Origin” компани сансрын аялал жуулчлалын хөтөлбөрийнхөө хүрээнд зургаан хүний бүрэлдэхүүнтэй “New Shepard” хөлгөөр дэд тойрог замын нислэгийг амжилттай гүйцэтгэлээ. Нислэгийг өнгөрсөн бямба гарагт АНУ-ын Техас муж улсын Ван-Хорн хотын ойролцоох “Launch Site One” сансрын хөлгийн буудлаас орон нутгийн цагаар өглөөний 09:30 цагт хөөргөсөн байна.
“New Shepard” хөлөг хөөрсөн цагаасаа хойш ердөө 11 минутын дотор дээд цэг болох далайн түвшнээс дээших 100 км өндөрт хүрч, дараа нь аюулгүйгээр дэлхийд бууж газарджээ. Энэ удаагийн нислэгт оролцсон зургаан жуулчны дунд Техасын багш Айметт Медина Хорхе, рентген оношилгооны эмч Гретхен Грин, Панамын бизнес эрхлэгч Хайме Алемен, Америкийн бизнес эрхлэгч Пол Жерис, Канадын уулчин Жесси Уильямс нар багтсан байна.
Тус нислэг нь “Blue Origin” компанийн сансрын аяллыг олон нийтэд илүү хүртээмжтэй болгох зорилтот алхмуудын нэг хэсэг юм. Дахин ашиглах боломжтой “New Shepard” хөлгийг тусгайлан суборбитал буюу дэд тойрог замын нислэгт зориулан бүтээсэн бөгөөд өнөөг хүртэл 64 хүн уг хөлгөөр сансарт аялжээ. Тэдний дөрөв нь хоёр удаа нислэгт оролцсон гэдгээрээ онцлогтой байна.
Эх сурвалж: TASS
