АНУ, Хятадын хооронд үүссэн худалдааны хурцадмал байдал, хагас дамжуулагчийн худалдаанд тавигдсан хязгаарлалт үргэлжилсээр байгаа хэдий ч дэлхийн чипийн томоохон үйлдвэрлэгч Nvidia компанийн хувьцаа тавдугаар сарын 29-ний өдөр 6 хувиар өссөн тухай Bloomberg мэдээлжээ.

Ийнхүү өсөлт гарсан нь компанийн хоёрдугаар улирлын ашгийн таамаг хүлээлтээс өндөр гарсантай холбоотой аж. Nvidia компанийн мэдээлснээр, тэд II улиралд 45 тэрбум ам.долларын орлого олох төлөвтэй байгаагаа зарласан нь шинжээчдийн дүгнэсэн 43.3 тэрбум ам.доллараас давсан үзүүлэлт болжээ.

Тус компанийн хувьд АНУ-аас тавьсан экспортын хязгаарлалтаас болж Хятадад хагас дамжуулагч бүтээгдэхүүнээ чөлөөтэй худалдах боломжгүй болсон ч, дотоодын болон бусад зах зээл дээрх эрэлт өндөр байгаагаас шалтгаалан орлогоо нэмэгдүүлж чадсан байна. Хятадын зах зээлээс ойролцоогоор 8 тэрбум ам.долларын алдагдал хүлээгээд байгаа ч, хамгийн сүүлийн үеийн өндөр үнэтэй чипүүдийн борлуулалт сайн байгаа нь компанийн өсөлтөд түлхэц болжээ.

Nvidia компанийн зүгээс хязгаарлалтын нөхцөлд нийцэх, өөр шийдэл бүхий шинэ бүтээгдэхүүнийг хятадын зах зээлд санал болгохоор ажиллаж буйгаа ч мэдэгдсэн байна.

Сонирхуулахад, гуравдугаар сарын 1-нд АНУ-ын гаалийн татварын дараа Nvidia-ийн хувьцаа огцом унаж, бараг 140 тэрбум ам.долларын үнэлгээ алдаад байсан ч, одоо энэ уналтаа нөхөж, өсөлттэй үргэлжилж байна.

Эх сурвалж: Bloomberg, OfficeLife