Цахим хөгжил, харилцаа холбооны яамнаас (ЦХИХХЯ) төрийн үйлчилгээний хүртээмжийг нэмэгдүүлэх зорилгоор 11 аймгийн 198 сумд киоск машин хүлээлгэн өгөөд байна. Энэ нь төрийн үйлчилгээг хөдөө, орон нутгийн иргэдэд түргэн шуурхай хүргэх ажлын нэг хэсэг юм.
Тус яамнаас 21 аймгийн 330 сумыг бүхэлд нь хамруулах зорилгоор цахим үйлчилгээний киоск машин суурилуулах ажлыг үе шаттай хэрэгжүүлж байгаа бөгөөд өнөөгийн байдлаар нийт суурилуулалтын 60 орчим хувь хийгдээд байна. Киоск машин нь иргэдэд төрийн 35 төрлийн 103 үйлчилгээ үзүүлэхээс гадна, хувийн хэвшлийн 60 гаруй байгууллагын 600 орчим үйлчилгээ, тоон гарын үсгийн баталгаажуулалт, автомашинтай холбоотой бүртгэл, санхүүгийн үйлчилгээ, эрүүл мэндийн үйлчилгээ, гар утасны бүх төрлийн үйлчилгээ зэргийг төвөггүй авах боломжийг бүрдүүлж байгаа юм.
Энэхүү шийдэл нь олон төрлийн бичиг баримт бүрдүүлэх, удаан дараалалд хүлээх асуудлыг шийдвэрлэхээс гадна хөдөө орон нутгийн иргэдэд төрийн үйлчилгээг хүргэх гол гарц болж байна. Иргэд зөвхөн иргэний үнэмлэхтэй байхад л олон төрлийн үйлчилгээг цахимаар авах боломжтой болсноор төрийн үйлчилгээнд зарцуулах хугацаа, зардал мэдэгдэхүйц буурч, илүү хүртээмжтэй, иргэн төвтэй хэлбэрт шилжиж байна.
Эх сурвалж: ЦХИХХЯ
