Цахим хөгжил, харилцаа холбооны яамнаас төрийн бүх шатны байгууллагад албан ёсны лицензтэй программ хангамж ашиглахыг зөвлөмж болголоо. Энэ хүрээнд Засгийн газрын гишүүд, агентлагийн дарга нар болон аймаг, нийслэл, дүүргийн Засаг дарга нарт үүрэг чиглэл өгч, шүүх, прокурор, УИХ-аас удирдлагыг нь томилдог байгууллагуудын удирдлагад зөвлөмж хүргүүлжээ.

Төрийн мэдээллийн ил тод байдлыг хангах зорилгоор shilen.gov.mn системд энэ оны эхний улирлын байдлаар нийт 1,135 байгууллага мэдээллээ байршуулсан байна. Үүнээс төрийн захиргааны төв байгууллагуудын 92.61 хувь, төрийн захиргааны байгууллагуудын 79.61 хувь, НЗДТГ-ын 55.59 хувь, нутгийн захиргааны байгууллагуудын 75.84 хувь нь мэдээллээ ил тод болгосон нь анхаарал татаж байна.

Мөн Төрийн нээлттэй өгөгдлийн портал (opendata.gov.mn)-д 2025 оны тавдугаар сарын 19-ний байдлаар 58 байгууллагаас 53 нь буюу 91.3 хувь нь нийт 3,091 өгөгдөл байршуулж, иргэд 27,351 удаа татан авчээ. Энэ нь төрийн мэдээллийг иргэдэд хүртээмжтэй, нээлттэй хүргэж эхэлснийг илтгэж байна.

Төрийн байгууллагуудын цахимжуулалтын үр дүнд бичиг хэрэг, шуудангийн зардал 50-иас доошгүй хувиар буурсан гэж яамнаас мэдээлжээ. Харин программ хангамжийн тухайд, 5,671 байгууллагын 17 хувь буюу 939 байгууллага нийт 49,017 компьютер ашиглаж байгаагийн 88.5 хувь, мөн 2,261 серверийн 79 хувь нь “Майкрософт”-ын бүтээгдэхүүн ашиглаж буй нь судалгаагаар тогтоогджээ.

Сүүлийн хоёр жилд зөвхөн 68 төсвийн байгууллага “Майкрософт”-ын 6 төрлийн нийт 138,164 ширхэг лицензийг 5.5 тэрбум төгрөгөөр худалдан авсан нь төрийн программ хангамжийн зардалд хэр хэмжээний төсөв зарцуулж байгааг харуулж байна.

Ийнхүү төрийн үйл ажиллагааг цахим хэлбэрт бүрэн шилжүүлэх зорилгоор программ хангамжийн хуулийн хэрэгжилтийг сайжруулах, зохиогчийн эрхийг хүндэтгэх, цахим аюулгүй байдлыг хангах чиглэлд бодит алхмууд хийгдэж байна.

Эх сурвалж: Цахим хөгжил, харилцаа холбооны яам