2018 онд Британийн алдарт “Christie’s” дуудлага худалдааны ордон хиймэл оюун ухаанаар бүтээсэн анхны урлагийн бүтээлийг үнэ хаялцуулан, 432 500 ам.доллароор худалдсан нь дэлхий дахинд шуугиан тарьж байв. Гэвч Хонконгийн зураач, киноны тусгай эффект болон уран баримлын чиглэлээр ажилладаг Виктор Вонг энэ бүтээлийг жинхэнэ эргэлт гэж үзсэнгүй. Тэрбээр “Энэ бол хүний бүтээлийг дуурайж, зурах төдий зүйл” хэмээн шүүмжилж, илүү өвөрмөц, хүний төсөөллийг давсан бүтээлийг хийхээр шийджээ.

Ингээд тэрбээр инженерийн мэдлэг, уран бүтээлийн туршлагаа нэгтгэн “AI Gemini” нэртэй хиймэл оюунаар удирддаг зураач роботоо бүтээв. Энэхүү робот нь будгийн багс барин Вонгийн програмчилсан алгоритмын дагуу Хятадын уламжлалт ландшафтын зургийг зурдаг. Түүнийг төлөөлдөг 3812 Gallery “AI Gemini бол дэлхийн анхны бэхэн зураг зурдаг хиймэл оюуны зураач” хэмээн онцолжээ.

“AI Gemini”-гийн хамгийн сонирхолтой цуврал бүтээлүүдийн нэг нь Хятад улс Сарны цаад тал руу явуулсан төхөөрөмжөөс санаа авч зурсан цуврал юм. Вонг эдгээр зургийг НАСА-гийн 3D Сарны газрын зураг, санхүүгийн зах зээл дэх хувьцааны үнийн хөдөлгөөний мэдээлэл зэргийг ашиглан зуржээ. Жишээ нь, индексийн уналт, өсөлтийг уул, хөндийн хэлбэрт шилжүүлэн дүрсэлсэн байна. Ийм хэмжээний зургууд нэг метр орчим өндөр, өргөнтэй бөгөөд нэг зураг зурахад ойролцоогоор 8–10 цаг зарцуулдаг аж.

“AI Gemini” төслийн хүрээнд түүний бүтээлүүд Хонконг, Шанхай, Тайбэй, Лондон хотуудад үзэсгэлэнгээр дэлгэгдэж, 20 мянга орчим ам.долларын үнэтэйгээр зарагдсан байна. Мөн Хонконгийн “Cathay Pacific” зэрэг томоохон байгууллагуудтай хамтран ажилласан нь Вонгийн хиймэл оюунд тулгуурласан урлагийн шинэ төрлүүд хэрхэн бодит хэрэглээ, зах зээлд нийцэж байгааг харуулж байна.

Эх сурвалж: CNN