Нийгмийн даатгалын байгууллага хиймэл оюун ухааныг үйлчилгээндээ нэвтрүүлнэ
Хиймэл оюун ухаан, дижитал шилжилт хурдацтай явагдаж буй өнөө үед төрийн байгууллагууд технологийн шинэчлэлд идэвхтэй оролцож байна. Энэ хүрээнд Нийгмийн даатгалын ерөнхий газар хиймэл оюун ухааныг үйлчилгээндээ нэвтрүүлэх зорилгоор “Аствишн” ХХК-ийн төлөөлөлтэй уулзаж, санал бодлоо солилцжээ.
Нийгмийн даатгалын үйлчилгээ даатгуулагчийн итгэл, сэтгэл ханамжид суурилсан байх ёстойг онцолж, тус газрын дарга иргэдэд үзүүлэх үйлчилгээг бүрэн цахимжуулах нь хамгийн гол зорилго гэдгийг тэмдэглэсэн байна. Мөн энэ ажлыг хэрэгжүүлэхэд хувийн хэвшлийн технологийн компаниудын оролцоо чухал гэдгийг онцолж, хамтран ажиллахыг уриалжээ.
Одоогоор нийгмийн даатгалын байгууллага 34 төрлийн үйлчилгээг иргэд болон ажил олгогчдод үзүүлдэг бөгөөд тэдгээрийн 24 үйлчилгээг аль хэдийн цахимжуулсан байна. Үүнээс 18 төрлийн үйлчилгээ нь E-Mongolia платформд холбогдсон бөгөөд иргэд нэг цонхоор нэвтрэн хялбархан авах боломжтой болжээ.
Цаашид энэхүү үйлчилгээг улам өргөжүүлж, хиймэл оюун ухаанд суурилсан шийдлүүдийг нэвтрүүлснээр хэрэглэгчийн асуултад автомат хариу өгөх, мэдээллийн үнэн зөвийг шалгах, хэрэглээний өгөгдөлд үндэслэн эрсдэлийн шинжилгээ хийх зэрэг олон боломж нээгдэх юм.
Эх сурвалж: Нийгмийн даатгалын ерөнхий газар
