Хятадын автомашин үйлдвэрлэгч BYD компани 2025 оны дөрөвдүгээр сард Европын зах зээл дээр анх удаа АНУ-ын Tesla-г цахилгаан автомашины борлуулалтаар давсан тухай “Bloomberg” агентлаг Jato Dynamics-ийн шинжээчдийн мэдээллийг иш татан мэдээллээ.
Тодруулбал, BYD энэ сарын хугацаанд Европт 7,231 ширхэг цахилгаан автомашин борлуулсан нь өмнөх оны мөн үеийнхээс 169 хувиар өссөн үзүүлэлт болсон бол Tesla ижил хугацаанд 7,165 ширхэг автомашин борлуулж, өмнөх оныхоос 49 хувиар буурсан байна. Ийнхүү олон жилийн турш жагсаалтыг тэргүүлж ирсэн Tesla анх удаа 11 дүгээрт бичигдсэн бол BYD эхний 10-т багтаж, Европын зах зээлд шинэ өрсөлдөгчийн дүрээр хүчтэй орж ирлээ.
“Хоёр компанийн борлуулалтын зөрүү харьцангуй бага мэт боловч энэ нь Европын цахилгаан автомашины зах зээлд эргэлт авчирсан томоохон дохио” хэмээн Jato Dynamics-ийн шинжээч Фелипе Муньос онцолжээ.
Европын цахилгаан автомашины зах зээл 2025 оны дөрөвдүгээр сард нийт 28 хувиар тэлсэн бол Skoda брэндийн борлуулалт 214 хувиар өссөн нь онцлох үзүүлэлт болж байна. Тус сард хамгийн их борлуулалттай цахилгаан автомашины топ 3 дараах байдлаар бүрдсэн байна:
-
Volkswagen – 23,514 ширхэг
-
BMW – 14,867 ширхэг
-
Skoda – 13,598 ширхэг
Эдгээрээс Европын долоо, Өмнөд Солонгосын хоёр, Хятадын нэг буюу BYD багтаж байгаа нь бүс нутгийн зах зээлд Хятадын оролцоо идэвхжиж байгааг харуулж байна.
BYD компани цаашид Европын зах зээлд “Dolphin Surf” нэртэй бүрэн цахилгаан хэтчбэк загварын машиныг 23 мянган еврогоос доош үнээр танилцуулах төлөвлөгөөтэй байгаа бөгөөд энэ нь зах зээлд өрсөлдөөнийг улам эрчимжүүлэх хүлээлттэй байна.
Эх сурвалж: Forbes, Bloomberg, Jato Dynamics
