НҮБ-ын Хөгжлийн хөтөлбөрөөс өнөөдөр 2025 оны Хүний хөгжлийн илтгэлийг танилцуулж, “Хиймэл оюуны эрин дэх хүмүүсийн сонголт ба боломжууд” сэдвийн хүрээнд хэлэлцүүлэг өрнүүллээ. Уг илтгэлд хиймэл оюуны хурдацтай хөгжил нь хүний хөгжилд шинэ боломжуудыг нээж буй ч хүртээмжтэй, хүн төвтэй бодлого үгүйлэгдэж байгааг онцлов.

Хүний хөгжлийн үзүүлэлтүүд цар тахлын өмнөхөөс хойш сэргэх бус харин ч удааширч байгаа бөгөөд 1990 оноос хойших хамгийн доод түвшинд хүрснийг илтгэлд дурджээ. Энэ нь Тогтвортой хөгжлийн зорилгуудын хэрэгжилт хэдэн арван жилээр хойшлох эрсдэлтэйг илтгэж байна.

НҮБХХ-ийн суурин төлөөлөгч Матилда Димовска “Хиймэл оюуныг хүний хөгжлийг дэмжихэд чиглүүлэн ашиглах нь илүү чухал. Технологийг зөв, ёс зүйтэй, хүн төвтэй ашиглаж чадвал ‘Алсын хараа-2050’ болон Тогтвортой хөгжлийн зорилгуудын хэрэгжилтэд дэмжлэг үзүүлж чадна” хэмээн онцоллоо.

Илтгэлд:

• Хүний хөгжлийг хиймэл оюуны хөгжүүлэлттэй уялдуулсан эдийн засгийн шинэ загвар гаргах,

• Боловсрол, эрүүл мэндийн тогтолцоог 21-р зууны хэрэгцээнд нийцүүлэх,

• Хиймэл оюуны хэрэглээний бүхий л үе шатанд хүний оролцоог нэмэгдүүлэх зэрэг зөвлөмж тусгагдсан байна.

Монгол Улсын хувьд, Хүний хөгжлийн индекс 0.747 болж, 193 улсаас 104-д эрэмбэлэгдэж байгаа бөгөөд 1990 оноос хойш дундаж наслалт 12.9 жилээр, сургуульд суралцах хугацаа 3.5 жилээр нэмэгджээ. Мөн нэг хүнд ногдох үндэсний нийт орлого 148.4 хувиар өссөн байна.

Эдгээр өсөлтүүдийг тогтвортой хадгалах, дараагийн түвшинд гаргахын тулд хиймэл оюуны хөгжлийг үндэсний хөгжлийн тэргүүлэх чиглэлүүдтэй уялдуулах шаардлагатайг илтгэлийн үеэр онцолсон юм.

Эх сурвалж: НҮБХХ