“И-Монгол академи” УТҮГ болон Улсын хоёрдугаар төв эмнэлэг урт хугацаанд хамтран ажиллах стратегийн түншлэл эхлүүлж, 2025 оны 05 сарын 16-ны өдөр хамтын ажиллагааны санамж бичигт гарын үсэг зурлаа. Энэхүү санамж бичиг нь эрүүл мэндийн үйлчилгээний цахимжилтыг эрчимжүүлэн нэмэгдүүлэх, байгууллагын дотоод нөөц, чадавхад тулгуурлан хөгжлийн шинэ боломжуудыг бүрдүүлэх, албан хаагчдын эрүүл мэндийг хамгаалах цогц бодлогыг дэмжихэд чиглэж байна.
Хамтын ажиллагааны хүрээнд:
- Иргэдэд зориулсан эрүүл мэндийн боловсролын хөтөлбөр боловсруулж, сургалт, танин мэдэхүй контент хүргэх;
- Эрүүл мэндийн салбарын ажилтнуудад зориулсан мэдээллийн технологийн сургалт, зөвлөмжийг тогтмол зохион байгуулах;
- Цахим цаг захиалга, хариу мэдэгдэл, сануулга зэрэг үйлчилгээг илүү хүртээмжтэй, хэрэглэгч төвтэй болгон сайжруулах;
- Төрийн байгууллагын нэгдсэн ERP системийн нэвтрүүлэлт, ашиглалтад мэргэжлийн зөвлөмж, дэмжлэг үзүүлэх;
- “И-Монгол академи” УТҮГ-ын нийт албан хаагчдыг жилийн урьдчилан сэргийлэх үзлэг, MRI оношилгоонд хамруулах, эрүүл мэндийн тусламж үйлчилгээг хөнгөлөлттэй үнээр авах боломжийг судлан хэрэгжүүлэхэд чиглэж байна.
Мөн дуудлагын төвийн үйл ажиллагааг сайжруулах, мэдээллийн аюулгүй байдлын стандартыг мөрдүүлэх чиглэлээр ч үр дүнтэй хамтран ажиллах нөхцөл бүрдэж байгаа юм.
“И-Монгол академи” болон Улсын хоёрдугаар төв эмнэлгийн хамтын ажиллагаа нь эрүүл мэндийн салбарын цахим шинэчлэлийг дэмжсэн, тогтвортой, иргэдэд ээлтэй, хүртээмжтэй байх тал дээр илүү анхаарах юм. Цаашид төрийн байгууллагуудын дотоод үйл ажиллагааны менежмент, эрүүл мэндийн мэдээллийн хүртээмж, албан хаагчдын эрүүл мэндийг хамгаалах бодлогын хэрэгжилтийг шинэ түвшинд гаргах суурийг тавьж буйгаараа онцлог юм.
