Гаалийн ерөнхий газар (ГЕГ) БНСУ-ын Засгийн газрын санхүүжилтээр 2025–2026 онд “Хиймэл оюунд суурилсан дэвшилтэт технологийг нэвтрүүлж, гаалийн шинэчлэлийг бэхжүүлэх нь” нэртэй төслийг хэрэгжүүлэхээр боллоо. Энэхүү төсөл нь гаалийн хяналт шалгалтын үр нөлөөг нэмэгдүүлэх, гадаад худалдааг хөнгөвчлөх, авлигагүй, ил тод удирдлагын тогтолцоог бүрдүүлэх зэрэг олон талын ач холбогдолтой юм.
Төслийн хүрээнд БНСУ-ын тэргүүлэх технологийн гурван байгууллага болох B2EN, Virnect, Rebelliion хамтарсан консорциум ажиллах бөгөөд тэд гаалийн туслах систем, нэгдсэн мэдээллийн хайлтын платформ, NPUS бүхий хиймэл оюуны сервер зэрэг технологийн шийдлийг нэвтрүүлэхэд мэргэжлийн дэмжлэг үзүүлнэ.
Төслийг хэрэгжүүлснээр дараах ахиц дэвшлийг авчирна:
-
Эрсдэлтэй ачааг урьдчилан илрүүлэх чадвар нэмэгдэнэ
-
Гаалийн хяналт, шалгалтын үр нөлөө дээшилнэ
-
Гадаад худалдааны үйл ажиллагаа хялбар, шуурхай болно
-
Хилийн хяналт, цахим шилжилтийн чадавх сайжирна
-
Татварын орлого нэмэгдэж, хууль сахиулах үр нөлөө дээшилнэ
Хамтын ажиллагааны төсөл хариуцсан захирал Рю Жий Сон “Монгол Улсын гаалийн салбар тодорхой хэмжээнд цахимжсан ч мэдээллийг үр дүнтэй ашиглаж чадахгүй байгаа нь томоохон сул тал юм. Энэхүү төслөөр дамжуулан их өгөгдлийн санг боловсронгуй болгож, гаалийн ажилтнууд мэдээлэлд суурилсан оновчтой шийдвэр гаргах боломжтой болно” хэмээн онцолжээ.
Уг төсөл нь Монгол Улсын гаалийн байгууллагыг олон улсын түвшний ухаалаг хяналтын системтэй болгох, цаашлаад бүс нутгийн логистикийн ухаалаг сүлжээнд интеграцчилах эхний томоохон алхам болно гэж салбарынхан үзэж байна.
Эх сурвалж: ГЕГ, БНСУ-ын KOICA, төслийн консорциум
