Сүүлийн 30 жилийн турш эрдэмтэд “харанхуй эрчим хүч”-ний нөлөөгөөр Сансар хорвоо хурдацтай тэлж байна гэж үзэж ирсэн. Харин БНСУ-ын Yonsei University-ийн профессор Young-Wook Lee тэргүүтэй судалгааны багийнхан энэ онолд эргэлзээ төрүүлсэн шинэ үр дүн танилцууллаа. Тэдний судалгаагаар орчлон ертөнц хурдасаагүй, харин тэлэлтийн хурд удааширч байгаа нь тогтоогджээ. Энэ судалгаа Хаантны Одон орон судлалын нийгэмлэгийн Monthly Notices сэтгүүлд нийтлэгдсэн байна.
Эрдэмтэд 300 гаруй галактикийн хэт шинэ Ia төрлийн оддыг судалж, эдгээр “стандартын лаа” гэж нэрлэгддэг оддын гэрэлтэлт тэднийг үүсгэсэн оддын насыг дагаж өөрчлөгдөж байгааг илрүүлсэн байна. Энэ системчилсэн хазайлтыг засаж тооцоход Сансар хорвоо одоо хэт хурдан бус, харин удааширсан тэлэлтийн үедээ орсон болох нь тогтоогджээ. Судалгааны магадлал 99.999 хувьтай гэж эрдэмтэд мэдэгдсэн байна.
Энэхүү дүгнэлт нь орчлонгийн одоогийн Lambda-CDM стандарт загварт нийцэхгүй бөгөөд үүний оронд Dark Energy Spectroscopic Instrument (DESI) төсөлд суурилсан шинэ загварт илүү нийцэж байна. Энэ шинэ таамаглалаар “харанхуй эрчим хүч” нь цаг хугацааны явцад суларч, орчлонгийн тэлэлт удааширч буйг илтгэнэ.
“Бидний судалгаа орчлон одоо удааширсан тэлэлтийн үедээ орж байгааг харуулж байна. Хэрэв энэ батлагдвал 27 жилийн өмнө тогтоогдсон ‘харанхуй эрчим хүч’-ний тухай ойлголтыг үндсээр нь шинэчлэх алхам болно” хэмээн профессор Young-Wook Lee онцолсон юм.
Эрдэмтэд одоо залуу оддоор дүүрэн галактикуудыг тусад нь шинжилж байгаа бөгөөд анхны дүн шинжилгээнүүд тэдний гол дүгнэлтийг дахин баталж эхэлжээ.
Эх сурвалж: Sci.news, GCTC.ru.
