Өмнөд Солонгосын “Samsung Electronics” компани өнөөдөр худалдаанд гаргасан ухаалаг утаснуудаасаа хамгийн нимгэн загвар болох “S25 Edge”-ийг олон нийтэд танилцууллаа. Хиймэл оюун ухааны дэвшилтэт функцүүдээр тоноглогдсон энэхүү загвар нь өндөр үнэтэй гар утасны зах зээлд “Apple”-аас урьтаж худалдаанд гарч буйгаараа онцлог юм.
“S25 Edge” нь авсаархан, нимгэн гар утас хэрэглэхийг илүүд үздэг 20-30 насны хэрэглэгчдийг гол хэрэглэгчээрээ тодорхойлсон байна. “Samsung”-ийн мэдэгдсэнээр, хэрэглэгчдийн зүгээс өндөр үзүүлэлттэй хэрнээ нимгэн, авч явахад хялбар утасны эрэлт их байсныг харгалзан бүтцийн шийдэлд өөрчлөлт хийж, эд ангиудыг илүү нимгэн болгожээ.
Шинжээчдийн үзэж байгаагаар энэ шинэ загварыг танилцуулсан нь “Apple”-ийн хүлээгдэж буй нимгэн iPhone загвараас өрсөн стратеги гэж дүгнэж байна. “NH Investment & Securities” фирмийн ахлах шинжээч Рю Янг Хо “Samsung” бүтээгдэхүүнээ хэдэн сарын өмнө гаргаснаар нимгэн загвар хайж буй хэрэглэгчдийг татах боломжийг оновчтой тооцоолсон” хэмээн онцолжээ.
“S25 Edge” загвар энэ сарын 23-наас Өмнөд Солонгост, 30-наас АНУ-д худалдаанд гарч, цаашид 30 орчим улсад нийлүүлэхээр төлөвлөж байна. Уг загвар 1099 ам.долларын үнэтэй, 6.7 инчийн дэлгэцтэй бөгөөд ердөө 5.8 мм зузаантайгаар бүтээгдсэн. Энэ нь үндсэн S25 загвараас том хэмжээтэй ч бага зэрэг хүнд загвар болжээ.
“Counterpoint Research”-ийн судалгаагаар, “Samsung” компани 2025 оны эхний улиралд дэлхийн гар утасны зах зээлийн 20 хувийг эзэлж, 19 хувийн үзүүлэлттэй байгаа “Apple”-ийг гүйцэж түрүүлэн ухаалаг утасны борлуулалтаараа дэлхийд тэргүүлсэн байна.
Эх сурвалж: Reuters
