Нийслэлийн Засаг даргын Тамгын газар болон нийслэлийн Гэмт хэргээс урьдчилан сэргийлэх ажлыг зохицуулах зөвлөлөөс Тээврийн цагдаагийн албанд дэлхийн 76 улсын цагдаагийн байгууллагын хэрэглэдэг “MD-Video AI” программыг албан ёсоор хүлээлгэн өглөө.
Уг программыг БНСУ-ын GMD soft компани хөгжүүлсэн бөгөөд мөрдөн шалгах ажиллагаанд ашиглагдах нотлох баримт цуглуулах, хяналтын камерын бичлэг тодруулах, гэмт хэрэг үйлдсэн этгээдийн царай төрх болон бусад эд зүйлсийг таньж олоход зориулагдсан. Мөн ашиглах боломжгүй болсон гар утаснаас мэдээлэл сэргээх зэрэг олон талын давуу талтай.
Нийслэлийн хэмжээнд одоогийн байдлаар 176 уулзвар, гарцад нийт 2606 ухаалаг камер ажиллаж буй. Эдгээрийг хянадаг нэгдсэн төв “MD-Video AI” програмтай хослон ажилласнаар камерын бичлэгийг нарийвчлан шалгах, гэмт хэргийн нотлох баримтыг түргэн шуурхай бүрдүүлэх боломж бүрдэх аж. Ингэснээр гэмт хэргийг илрүүлэх хугацаа, зардлыг хэмнэхээс гадна цагдаа, мөрдөгчдийн ажлын ачааллыг бууруулах өндөр ач холбогдолтой гэж албаны хүмүүс онцолж байна.
Тээврийн цагдаагийн албаны Мөрдөн шалгах хэлтсийн дарга, цагдаагийн дэд хурандаа В.Хосбаярын хэлснээр, “MD-Video AI” програм нь чанарын шаардлага хангахгүй бичлэгээс хүртэл нотлох баримт гарган авах боломжийг олгож буй нь иргэдийн эрхийг сэргээх, хэргийг шийдвэрлэх ажиллагаанд чухал түлхэц болж байна.
Нийслэлийн Засаг дарга Х.Нямбаатарын мэдээлснээр, “MD-Video AI” программтай хамт иж бүрэн өндөр хүчин чадалтай компьютерын тоног төхөөрөмжийг нийслэлийн Засаг даргын нөөц хөрөнгөөс санхүүжүүлэн хангахаар шийдвэрлэжээ.
Эх сурвалж: НЗДТГ
