ХБНГУ-ын Ерөнхийлөгч Франк-Вальтер Штайнмайерын инстаграм хуудсанд “Уулын Карабахын Бүгд Найрамдах Улс” (УКБНУ)-ын далбааг нийтэлсэнтэй холбогдуулан Азербайжаны тал албан ёсоор уучлалт хүссэн тухай “Azertag” агентлаг мэдээлэв. Уг зураг Ерөнхийлөгч Арменид айлчилж буй үеэр, гуравдугаар сарын 31-нд нийтлэгдсэн бөгөөд Азербайжаны Гадаад хэргийн яам үүнийг “улс төрийн илт өдөөн хатгалга” хэмээн үзэн эсэргүүцэл илэрхийлсэн байна.

Германы Элчин сайд Ральф Хорлеман Азербайжаны Гадаад яаманд дуудагдаж, тайлбар өгөх шаардлага тавигдсан. Үүний дараа Ерөнхийлөгчийн Тамгын газрын дарга Дорте Дингер Азербайжаны Ерөнхийлөгчийн туслах Хикмет Гажиевт захидал илгээж, энэ нь техникийн алдаа байсан хэмээн тайлбарлаж, нийтлэлийг нэн даруй устгасан бөгөөд албан ёсны байр суурийг тусгаагүйг онцлон уучлалт гуйжээ.

Мөн дөрөвдүгээр сарын 1-нд Штайнмайер Арменид айлчлалын үеэр мэдэгдэл хийхдээ, Армени болон Азербайжаны хооронд энх тайван тогтоох нь Өмнөд Кавказын бүс нутагт ихээхэн ач холбогдолтой гэдгийг онцлон дурдсан.

Хоёр улс энхийн хэлэлцээр байгуулахаар ажиллаж байгаа бөгөөд 17 заалтын 15-д тохиролцоод байгаа талаар мэдээлжээ. Харин одоогоор “Олон улсын шүүхэд харилцан нэхэмжлэл гаргахгүй байх” болон “хилийн бүсэд гуравдагч орны цэргийг байршуулахгүй байх” хоёр асуудлыг хэлэлцэх үлдээд байгаа аж.

Эх сурвалж: DW, Azertag.