Монгол Улсын үүлэн технологийн чиглэлээр дагнан үйл ажиллагаа явуулдаг Fibo Cloud компани Узбекистан Улсын харилцаа холбооны тэргүүлэх оператор болох “Uztelecom JSC” компанитай үүлэн технологийг нутагшуулах хамтын ажиллагааны гэрээ байгуулжээ.

Энэхүү гэрээ нь Монголын технологийн компаниудын үүлэн тооцооллын чиглэлээр Төв Азид хийж буй хоёр дахь экспорт бөгөөд өмнө нь Fibo Cloud компани Казахстаны Транстелеком компанитай хамтран (cloud.ttc.kz) төслийг хэрэгжүүлж байсан юм.

Узбекистаны хувьд одоогоор Tier-3 түвшний хоёр дата төвтэй бөгөөд ирэх жилүүдэд тэдгээрийг тав болгож өргөтгөх, цаашлаад бүс нутгийн дижитал маркетплэйс бий болгох төлөвлөгөөтэй байгааг хоёр талын төлөөлөгчид хэлэлцсэн байна. Үүнтэй холбоотойгоор Монголын технологийн компаниуд PaaS (Platform-as-a-Service) хэлбэрээр өөрсдийн бүтээгдэхүүн, үйлчилгээг Узбекистаны бизнес эрхлэгчдэд хүргэх боломжтой болж байгаа бөгөөд төлбөр тооцоог компани байгуулах шаардлагагүйгээр хийх давуу талтай талаар Цахим хөгжил, инновац, харилцаа холбооны яам мэдээллээ.

Хамтын ажиллагаа нь 2023 оны зургаадугаар сард эхэлсэн бөгөөд хоёр жилийн турш мэдээллийн аюулгүй байдлыг хангах, нутагшуулах ажлууд хийгджээ. Тухайлбал, дотоодын хэрэглэгч таних систем, татварын системтэй холбох зэрэг шаардлагуудыг биелүүлснээр cloud.uztelecom.uz домэйнээр дамжуулан хэрэглэгчдэд хүрэх болсон байна.

Узбекистаны үүлэн тооцооллын зах зээл хурдацтай өсөж байгаа бөгөөд 2024 онд 202 сая ам.долларт, 2025-2029 онд жилд дунджаар 28.43 хувийн өсөлттэй байж, 2029 он гэхэд 550.10 сая ам.доллар хүрэх төлөвтэй байна.

Тус улсын “Uztelecom” компани нь 17 мянга гаруй ажилчинтай, 10 сая гаруй хэрэглэгчтэй бөгөөд Узбекистан даяарх өндөр хурдны кабелийн 92 хувийг эзэмшдэг. Өнгөрсөн оны гуравдугаар улиралд 510 сая ам.долларын орлого олсон нь өмнөх оны мөн үеийнхээс 13 хувиар нэмэгдсэн үзүүлэлт юм. Түүнчлэн тус компани Узбекистаны бүх бүсийн төвүүдэд 5G сүлжээ бүрэн нэвтрүүлээд байна.