Дэлхий нийтээр хиймэл оюуны (AI) хөгжүүлэлт эрчимжиж байгаа энэ үед Монгол Улс өөрийн онцлогт тохирсон хиймэл оюуны системийг бий болгох шаардлагатайг мэргэжилтнүүд онцолж байна. Одоогоор манай улсын иргэд гадны орны AI бүтээгдэхүүнийг ашиглаж байгаа ч, эдгээр системүүд Монголын тухай хангалттай мэдээлэлгүй байдаг учир буруу эсвэл хуучирсан мэдээлэл гаргах нь түгээмэл ажиглагддаг байна.

Цахим хөгжил, инновац, харилцаа холбооны яамны Цахим хөгжлийн бодлогын хэрэгжилтийг зохицуулах газрын дарга н.Бат-Өлзий энэ талаар хэлэхдээ:

“Бүрэн бус өгөгдлөөр хиймэл оюуныг сургавал буруу мэдээлэл өгч, буруу шийдвэр гаргах эрсдэлтэй. Тиймээс манай улс төрийн мэдээллийн сангуудаа нэгтгэж, AI хөгжүүлэлтийг үндэсний онцлогтоо нийцүүлэн хийх хэрэгтэй" гэв.

152 төрлийн мэдээллийн санг нэгтгэх ажлыг эхлүүлнэ

Одоогийн байдлаар төрийн 152 албан ёсны мэдээллийн сан байгаа бөгөөд эдгээр өгөгдлийг нэгтгэн, AI системд суурилсан нэгдсэн мэдээллийн бааз байгуулах ажил хийгдэж байна. Энэ нь:

• Иргэд төрийн үйлчилгээг автоматжуулсан хэлбэрээр авах боломжийг нэмэгдүүлнэ.
• Төрийн байгууллагууд дахин давтагдсан лавлагаа, тодорхойлолт нэхэх шаардлагагүй болно.
• Иргэний мэдээлэл бүрэн нууцлагдсан байх бөгөөд зөвхөн тухайн хүн өөрөө зөвшөөрөл өгсөн үед л ашиглах боломжтой болно.

“Нэгдсэн өгөгдөлтэй болж чадвал AI ашиглан иргэдэд хамгийн тохирсон төрийн үйлчилгээг санал болгох боломж бүрдэнэ. Жишээлбэл, иргэн насанд хүрч байгаа бол цэргийн бүртгэл, нийгмийн даатгал зэрэг шаардлагатай үйлчилгээг автоматаар санал болгох боломжтой" гэж н.Бат-Өлзий онцлов.

Монгол Улс AI хөгжүүлэлтийг үндэсний түвшинд хийхгүй бол гадаадын AI системүүд буруу, хэт ерөнхий мэдээлэл өгөхөөс гадна үндэсний соёл, нийгмийн онцлогт нийцээгүй шийдлүүд бий болох эрсдэлтэй юм.

Эх сурвалж: Цахим хөгжил, инновац, харилцаа холбооны яам