E-Mongolia систем нь төрийн үйлчилгээг цахимаар хүргэх зорилготой бөгөөд сүүлийн нэг сарын хугацаанд гадаадаас нийт 7 сая хандалт авсан байна. Тодруулбал, БНСУ-аас 3.5 сая, АНУ-аас 1.2 сая, ОХУ-аас 1 сая, БНХАУ-аас 800 мянга, Японоос 500 мянган хандалт бүртгэгджээ.
Эдгээр тоо баримт нь гадаадад амьдарч буй монгол иргэд төрийн үйлчилгээг цахимаар авах боломжийг өргөнөөр ашиглаж байгааг харуулж байна. E-Mongolia систем нь нийт 87 байгууллагын 1263 үйлчилгээг цахимаар авах боломжийг бүрдүүлсэн бөгөөд 2020 оны 10 дугаар сарын 1-ний өдрөөс хойш 1.9 сая хэрэглэгчдэд 62 сая удаагийн үйлчилгээг амжилттай үзүүлжээ.
Цаашид E-Mongolia системийг улам боловсронгуй болгож, хэрэглэгчдийн хэрэгцээнд нийцсэн шинэ үйлчилгээнүүдийг нэвтрүүлэхээр ажиллаж байна. Тухайлбал, 2025 онд хиймэл оюун ашиглан хүртээмжийг нэмэгдүүлэх төлөвлөгөөтэй байна.
Иргэд E-Mongolia системийг ашигласнаар цаг хугацаа, зардлаа хэмнэхээс гадна төрийн үйлчилгээг илүү хурдан, хялбар авах боломжтой болж байна. Тухайлбал, уламжлалт төрийн үйлчилгээг авахад иргэн дунджаар 2 цаг 30 минут зарцуулдаг байсан бол E-Mongolia системийг ашиглан 5 минутын дотор авах боломжтой болсон байна.
