Америкийн технологийн “Nvidia” компанийн хувьцааны ханш өдрийн туршид 9.5 хувиар унаснаар зах зээлийн үнэлгээ нь хамгийн их хэмжээгээр буюу 278.9 тэрбум ам.доллароор буурлаа. 

NASDAQ биржийн мягмар гаргийн арилжааны явцад тус компанийн нэгж хувьцааны үнэ 9.52 хувиар унаж, 108 ам.доллар болжээ. Компанийн зах зээлийн үнэлгээ 2.92 их наяд ам.доллароос 2.64 их наяд ам.доллар болсон нь АНУ-ын биржийн арилжааны түүхэн дэх хамгийн их хэмжээгээр буурсан үзүүлэлт юм.  “Nvidia”-гийн хувьцаа наймдугаар сарын 28-ны өдрөөс хойш 125.61 ам.доллароос 14 хувиар унасан байна. 

“Nvidia”-гийн хувьцааны үнэ буурсан нь хиймэл оюун ухаан (AI) хөгжүүлэх чиглэлээр ажилладаг компаниудын хэт халалттай зах зээлд хөрөнгө оруулагчдын үл итгэх байдал нэмэгдэж байгаатай холбоотой гэж шинжээчид үзэж байна. “BlackRock Investment” хүрээлэнгийн тэргүүн Жан Буевенийн хэлснээр, хиймэл оюун ухаан нь хөрөнгө оруулагчдын хүлээлтийг хангасан үр өгөөжийг авчирч эхлэх хүртэл "тэвчээр хэрэгтэй", энэ үйл явцад "ганцхан улирал биш олон жил шаардагдана".

АНУ-ын Хууль зүйн яам монополийн эсрэг мөрдөн шалгалтын хүрээнд “Nvidia” болон бусад хэд хэдэн компанид зарлан дуудах хуудас хүргүүлсэн байна. “Nvidia” компани Америкийн монополийн эсрэг хуулийг зөрчсөн эсэхийг нотлох баримтыг тус яам үргэлжлүүлэн хайж байгаа ажээ. “Nvidia” нь хэрэглэгчдэдээ нийлүүлэгчээ солиход саад хийхийг оролдож байгаагийн зэрэгцээ бусад компанийн үйлдвэрлэсэн чипүүдийг худалдаж авсан үйлчлүүлэгчдэд хориг тавьж байгаа явдалд монополийн эсрэг байгууллагууд санаа зовниж байна гэж эх сурвалжууд "Bloomberg" агентлагт мэдээлжээ.