Өнгөрсөн шөнө Samsung компани Сан-Франциско хотод уламжлал ёсоор "Unpacked" нэртэй шинэ бүтээгдэхүүний танилцуулгын арга хэмжээгээ зохион байгуулж, Galaxy S20, S20 Plus, S20 Ultra гэсэн гурван шинэ загварын ухаалаг утас албан ёсоор танилцууллаа.
Samsung компани хэрэглэгчдийн өндөр хэрэгцээнд нийцүүлэн хиймэл оюун ухаан, цоо шинэ мэдрэгчтэй камерын систем зохион бүтээжээ. Тухайлбал, Samsung Galaxy S20, S20 Plus загварууд нь 64 MP камертай бол S20 Ultra загварт 108 MP камер суулгаж өгснөөр дээд зэргийн чанартай зургууд дарах боломж бүрджээ.
Мөн S20 ба S20 Plus ухаалаг утаснууд 10 MP селфи камертай болсон бөгөөд харин S20 Ultra загвар нь 40 MP селфи камертай юм байна.
Түүнчлэн сайжруулсан мэдрэгч, хиймэл оюун ухааны тусламжтай одоо харанхуйд ч өндөр чанартай зураг авах боломжтой болжээ.
Шинэ ухаалаг утаснуудын камерын бас нэгэн гайхалтай үйлдэл нь "Single Take" гэх горим юм. Энэхүү үйлдлийн тусламжтай нэг удаа товчлуур дээр даран өргөн өнцөг, Live Focus зэрэг олон төрлөөр зэрэг зураг дарах боломж бүрджээ.
Мөн шинэ загварууд 100 дахин "Zoom" хийх чадвартай болсон байна.
Samsung компани сүүлийн жилүүдэд зурагтууддаа 8К технологийг нэвтрүүлж эхэлсэн бол тэд одоо үүнийг ухаалаг гар утаснууддаа суулгаж байна. Тодруулбал одоо Samsung Galaxy S20, S20 Plus, S20 Ultra ухаалаг утаснууд бүгд 8K чанартай бичлэг хийдэг болжээ. Мөн 8K чанартай бичлэгээ зогсоон, хүссэн дүрснээсээ 33 MP чанартай зураг гарган авч болох юм. Түүнчлэн хиймэл оюун ухааны тусламжтай гүйж байхдаа ч өндөр чанартай, тогтвортой бичлэг хийж болно.
Харин дэлгэцний хувьд Galaxy S20 (6,2 инч), S20 Plus (6,7 инч), S20 Ultra (6,9 инч)-ийн хэмжээтэй ба Amoled дэлгэц нь өмнөх загваруудаас хамаагүй хурдтай болжээ.
- Samsung Galaxy S20 загвар нь $999
- S20 Plus нь $1,199
- Samsung Galaxy S20 Ultra загвар нь $1,399-оор зарагдаж эхлэнэ.
Шинэ ухаалаг утаснуудыг 2020 оны гуравдугаар сарын 6-наас эхлэн худалдаанд гарна.
