Хот байгуулалт, барилга, орон сууцжуулалтын сайдын багцаас санхүүжүүлэн, “Эх үүсвэрээ бие даасан болон хэсэгчилсэн байдлаар шийдвэрлэсэн, байгаль орчинд ээлтэй, эрчим хүчний хэмнэлттэй, төрийн албан хаагчдын орон сууцны загвар төслийг аймаг, орон нутгийн засаг захиргаатай хамтран хэрэгжүүлэх /Бүсчилсэн хөгжлийн дагуух бүлэг сууринд/ 8 айлын орон сууцны загвар төсөл”-ийг 2024 онд 12 аймгийн 12 суманд хэрэгжүүлэхээр, гүйцэтгэгч байгууллагуудыг шалгаруулан, ажлаа эхэлсэн билээ. Тэгвэл Дорнод аймгийн Баян-Уул суманд төрийн албан хаагчдын 8 айлын орон сууцны анхны жишиг орон сууц ашиглалтад орж, улсын комисст хүлээлгэж өглөө.
Тус суманд хэрэгжүүлсэн 8 айлын орон сууцны төслийн зураг төслийг сумын Засаг даргын Тамгын газрын захиалгаар “Тоонтогранд”, инженер-геологийн судалгааны дүгнэлтийг “Гурвантэс” компани хийсэн бол Ерөнхий гүйцэтгэгчээр “Мишээл кристал хаус” компани ажилласан юм. Харин захиалагчийн хяналтыг “Төрийн орон сууцны корпораци” төрийн өмчит хязгаарлагдмал хариуцлагатай компанийн инженер, техникийн ажилтнууд хэрэгжүүлэн ажиллалаа.
Дашрамд дурдахад, аймаг, сумын хөрөнгөөр нэмэлтээр 8 айлын орон сууц барьж, нийт 16 айлын орон сууцыг ашиглалтад оруулсан нь онцлох үйл явдал байлаа.
