“Инженер технологийн дээд боловсрол” төслийн Удирдах хорооны 50 дугаар хурал болж, 2025 оны онцлох ажлуудыг танилцуулж, төслийн хэрэгжилт, хөтөлбөрүүдийн чанарыг сайжруулах чиглэлээр хийгдэж буй ажлын явцыг хэлэлцэв.
Хурлыг Боловсролын яамны Төрийн нарийн бичгийн дарга, Удирдах хорооны дарга Х.Батжаргал удирдан явуулж, Японы Элчин сайдын яамны нэгдүгээр нарийн бичгийн дарга Дабиде Цунакаке, Боловсролын яам болон ЖАЙКА-гийн төлөөлөгчид оролцлоо.
Боловсролын яамнаас 12 дахь жилдээ хэрэгжүүлж буй энэхүү төслийн хүрээнд “Монгол-Японы инженерийн боловсрол” симпозиумыг энэ оны есдүгээр сард амжилттай зохион байгуулж, ШУТИС болон Японы консорциумын 10 их сургуультай хамтран 2014–2024 онд хэрэгжсэн Бакалаврын хамтарсан болон Коосэн хөтөлбөрийн үр дүнг дүгнэсэн байна.
Мөн Япон улсын 60 гаруй их сургуультай хамтарсан тэргүүлэх 8 чиглэлээр хэрэгжүүлж буй МУИС, ШУТИС, ХААИС-ийн 26 судалгааны багийн үйл ажиллагаанд мониторинг хийж, судалгааны үр дүн, үйлдвэрлэлд нэвтрүүлэлт, инноваци, гарааны бизнес эхлүүлэх боломжийн талаар зөвлөмж хүргүүлснээ танилцууллаа.
Цаашид төслийн ажлыг зорилгод нь нийцүүлэн эрэмбэлж, богино хугацаанд оновчтой зохион байгуулах, санхүүжилтийн үр ашиг, төслийн хүртээмжийг нэмэгдүүлэх, хоёр улсын эрдэм шинжилгээ, судалгааны хамтын ажиллагааг өргөжүүлэх шаардлагатайг онцлон тэмдэглэв гэж Боловсролын яамнаас мэдээллээ.
