Нийслэлийн авто замын бүтээн байгуулалтын явцын талаар нийслэлийн Засаг дарга бөгөөд Улаанбаатар хотын Захирагч Х.Нямбаатар өнөөдөр мэдээлэл өгөв. Тэрээр Туулын хурдны замын бүтээн байгуулалтын бэлтгэл ажил 90 гаруй хувийн биелэлттэй байгааг хэллээ. Карьерын бэлтгэл хангагдаж, ажлын зураг бүрэн дууссан бөгөөд талбайд ажиллах кемп, техник тоног төхөөрөмжүүдийг оруулж эхэлсэн байна. Газар чөлөөлөлтийн ажил үргэлжилж буй бөгөөд Зэвсэгт хүчний жанжин штабтай хамтран трассын бүсэд байрлах 013 дугаар ангийн буудлагын полигоныг маргааш албан ёсоор шилжүүлэхээр төлөвлөжээ.

Хотын даргын хэлснээр Туулын хурдны замын бүтээн байгуулалтын ажил ирэх гуравдугаар сараас эхэлж, хоёр мянга хорин долоон оны долдугаар сарын нэгэнд зорчих хэсгийг нээхээр төлөвлөсөн байна. Зам ашиглалтад орсноор нийслэлийн авто замын түгжрэл арван таван хувиар буурах тооцоо гарчээ. Харин Туулын хурдны замыг холбох Тойрог хурдны замын төслийн тендерийг ирэх долоо хоногт нээж, энэ ондоо багтаан гүйцэтгэгч сонгон шалгаруулж, гэрээ байгуулахаар төлөвлөж байна. Уг зам бүрэн ашиглалтад орсноор Улаанбаатар хотын авто замын түгжрэл дөчин хувиар буурах боломжтой гэсэн тооцоо бий.

Х.Нямбаатар хотын замын хүчин чадлын талаар танилцуулж, өнөөдрийн байдлаар нийслэлд ная дөрвөн мянга орчим автомашин туулах боломжтой дэд бүтэцтэй байхад өдөр бүр зургаа зуун мянга гаруй машин хөдөлгөөнд оролцож, түгжрэл нэмэгдэж буйг тодотгов. Зуны улиралд түгжрэл харьцангуй багассанаар дөрвөн зуун тавин мянга орчим машин хөдөлгөөнд оролцдог аж. Тиймээс Туулын хурдны зам, Тойрог хурдны замын төсөл хэрэгжсэнээр хотын хөдөлгөөн мэдэгдэхүйц сийрэгжих хүлээлттэй байна.

НЗДТГ-ын мэдээлснээр, Туулын хурдны зам нь нийслэлийн зүүн хэсэг болох Улаанбаатар–Налайхын чиглэлээс баруун аймгууд руу салдаг аюулгүйн тойрог хүртэл үргэлжлэх бөгөөд нийт гучин хоёр километрийн урттай, зургаан эгнээтэйгээр баригдана. Нийслэлд авто замын бүтээн байгуулалтын төсөл, хөтөлбөр тасралтгүй үргэлжилж байна.