Спортын анагаах ухаан, эрдэм шинжилгээний төв өчигдөр “Нээлттэй өдөрлөг”-өө зохион байгуулж, байгууллагын үйл ажиллагаа, спортын шинжлэх ухааны үйлчилгээ, оношилгооны боломжийг олон нийтэд танилцууллаа. Өдөрлөгийн үеэр төвийн эрдэм шинжилгээний ажилтан, эмч, эмнэлгийн мэргэжилтнүүд иргэдэд спортын шинжлэх ухааны сорил тест, спортын анагаах ухааны үзлэг, оношилгоо хийж зөвлөгөө өгсөн байна. Үүний зэрэгцээ спортын анагаах, сэргээн засах, гэмтэл судлал зэрэг чиглэлд нийт арван дөрвөн сэдвийн сургалт, лекцийг явуулжээ.

Төвийн үйл ажиллагаа спортын гэмтэл согог судлал, зүрх судас судлал, сэргээн засах судлал, уламжлалт анагаах ухаан, эрүү нүүрний мэс засал, дүрс оношилгооны нарийн мэргэжлийн баг бүрэлдэхүүнээр дэмжигддэг. Хөдөлгөөн засалч, бага эмч нар ч мөн тамирчдад зориулсан үйлчилгээ үзүүлдэг бөгөөд өндөр ачаалалтай бэлтгэлийн дараа сэргэлтийг дэмжих зориулалттай амралтын капсул өрөөг шинээр тохижуулан ашиглалтад оруулжээ.

Спортын анагаах ухаан, эрдэм шинжилгээний төв нь Монгол Улсад спортын шинжлэх ухааны үндэс суурийг тавьсан ууган байгууллагын нэг бөгөөд тамирчдын эрүүл мэнд, бэлтгэлийн чанар, гүйцэтгэлийг шинжлэх ухааны үндэстэй дэмжих зорилготойгоор үйл ажиллагаагаа тасралтгүй өргөжүүлэн явуулсаар байна.

Эх сурвалж: Спортын анагаах ухаан, эрдэм шинжилгээний төв