Монгол Улсын Засгийн газрын Хэрэг эрхлэх газар, Гадаад харилцааны яам, НҮБ-ын Хүүхдийн сан хамтран “Хүүхдийн төлөөх орон нутгийн засаглал” сэдэвт орон нутгийн хэлэлцүүлгийг өнөөдөр зохион байгууллаа.

Энэхүү хэлэлцүүлгийг өнөөдөр тохиож буй Дэлхийн хүүхдийн өдрөөр зохион байгуулснаараа онцлогтой. Хүүхдийн эрхийн тухай конвенц батлагдсан энэ өдрийг дэлхийн 190 гаруй улс оронд тэмдэглэдэг бөгөөд хүүхдийг сонсох, хүүхдийн эрхийн төлөө үүрэг амлалт өгөх өдөр байдаг. Энэ жил “Миний өдөр. Миний эрх” уриатай тэмдэглэж байна. 

Хэлэлцүүлгийн үеэр НҮБ-ын Хүүхдийн сангаас 21 аймагт хийсэн хүүхдийн нөхцөл байдал, нийгмийн үйлчилгээний чанар хүртээмжийн талаарх чиг хандлага, үнэлгээний үр дүнгээс танилцууллаа. Энэхүү үнэлгээний гол зорилго нь Хүүхдийн эрхийн тухай конвенцын хэрэгжилтийг орон нутагт үнэлэх, цаашид цуглуулсан тоон болон чанарын мэдээлэл дээр тулгуурлан аймаг тус бүрээр хэрэгжүүлж болохуйц бизнес төлөвлөгөөг гаргаж ирэхэд оршино.

Мөн 2024-2025 онд хүүхэдтэй холбоотой хийсэн хамгийн сүүлийн үеийн судалгааны үр дүнгээс танилцууллаа. Тухайлбал, “Онцгой байдлын үеийн боловсролын салбарын бэлэн байдал” судалгааны үр дүнгээр зуд зэрэг онцгой байдлын үеийн төлөвлөгөө боловсролын салбарт шарадлагатай, жил бүрийн өвөлжилтийн хүндрэл, зудын нөхцөл байдлаас болж хүүхдүүд сургууль засвардах, хичээлийн хоцрогдолд орох эрсдэлтэйг онцоллоо.

Түүнчлэн Хөвсгөл, Төв, Баянхонгор, Говь-Алтай, Дорнодамйгийн төлөөлөл хүүхдийн чиглэлээр хийж хэрэгжүүлсэн ажлын сайн туршлага, шинэлэг санаачилгуудаас хуваалцав.

Хэлэлцүүлгээр төр, хувийн хэвшил, иргэний нийгмийн байгууллагуудын хамтын оролцоотой бодлогын уялдаа болон хүүхдэд чиглэсэн санхүүжилтийг сайжруулах чиглэлээр санал солилцов. Мөн хүүхдийн төлөө ил тод, хариуцлагатай, үр дүнд суурилсан үйлчилгээ үзүүлэх хамтын үүрэг хариуцлагыг илтгэж, Засаг дарга нарын “Амлалт”-ыг албан ёсоор баталгаажуулсан юм. 

Хэлэлцүүлэгт нийслэл болон 21 аймгийн удирдлага, тэр дундаа нийгмийн бодлого, гэр бүл, хүүхэд хөгжил хариуцсан мэргэжилтнүүд болон холбогдох яамд, хөгжлийн түншүүд, иргэний нийгмийн байгууллага, хүүхэд залуучуудын төлөөлөл, хувийн хэвшлийн төлөөлөгчид оролцов.

НҮБ-ын Хүүхдийн сан нь Монгол Улсын Засгийн газартай байгуулсан 2022-2027 оны хамтын ажиллагааны хөтөлбөрийн хүрээнд улс орон даяар үйл ажиллагаагаа хэрэгжүүлж буй. Ингэхдээ нийгмийн суурь үйлчилгээг хүүхэд бүрд, тэр дундаа алсалсан нутагт оршин суугаа хүүхдүүдэд тэгш хүртээмжтэй хүргэхийн тулд орон нутгийн засаг захиргаатай хамтран технологид суурилсан, шинэлэг, өртөг багатай шийдлүүдийг хэрэгжүүлэхийг зорьж байгаа аж.